112 жер қойнауы учаскесі аукционға қойылады
Қазақстанда жыл соңына дейін көмірсутектер бойынша жер қойнауын пайдалану құқығын беру үшін барлығы 112 учаске аукционға шығарылады. Бұл туралы Энергетика министрлігі мәлімдеді, деп хабарлайды Baspasoz.kz.
Кезекті электрондық аукцион 25 желтоқсанда e-Qazyna алаңында өтеді. Оған қатысуға өтінімдер 18 қарашаға дейін қабылданады.
Желтоқсандағы саудаға 56 жер қойнауы учаскесі ұсынылады. Олар Маңғыстау, Ақтөбе, Атырау, Батыс Қазақстан, Ұлытау, Қостанай және Қызылорда облыстарында орналасқан. Тізімде Бегімбет 1, Батыс Ұлытау, Шолақсай, Басқұмақ, Қарасу, Жасқайрат, Үстірт, Қосарал, Майлыкөл, Қарақамыс, Қаракөл және басқа да учаскелер бар. Аукцион қорытындысы бойынша инвесторларға көмірсутектерді барлау және өндіру, сондай-ақ жекелеген учаскелерде тікелей өндіру құқығы беріледі.
Жер қойнауын пайдалану құқығын алған компанияларға бірқатар инвестициялық міндеттеме жүктеледі. Атап айтқанда, келісімшарт жасалғаннан кейін бір жыл ішінде барлау жұмыстарының жобасын әзірлеу қажет. Үш жыл ішінде 2D сейсмикалық барлау жұмыстары жүргізіліп, ал учаске талаптарында қарастырылған жағдайда төрт жыл ішінде кемінде бір ұңғыма бұрғылануға тиіс.
Сонымен қатар өндіру кезеңінде компаниялар өткен жылғы өндірістік шығындарының 1%-ын қазақстандық мамандарды даярлауға, тағы 1%-ын елдегі ғылыми-зерттеу және тәжірибелік-конструкторлық жұмыстарға бағыттауы керек. Келісімшарт бойынша инвестициялардың тағы 1%-ы өңірдің әлеуметтік-экономикалық дамуы мен инфрақұрылымына жұмсалады.
Жергілікті қамтуға да талап қойылады. Оның үлесі жұмыстар мен қызметтерде кемінде 70%, тауарларда 30% болуы қажет. Қазақстандық мамандардың үлесі басшылар мен олардың орынбасарлары арасында кемінде 80%, құрылымдық бөлімше басшылары арасында 90%, ал мамандар мен білікті жұмысшылар арасында 100% болуы тиіс.
Ірі кен орындарына қосымша шарттар қарастырылған. Егер бастапқы геологиялық қор 100 млн тоннадан астам мұнайды немесе 50 млрд текше метрден астам табиғи газды құраса, инвестор өңдеу өндірісін құру немесе жаңғырту, өндірілген көмірсутекті Қазақстанда өңдеуге жіберу не басқа инвестициялық және әлеуметтік-экономикалық жобаларды іске асыру жөніндегі міндеттемелердің бірін орындауы керек.
Энергетика министрлігінің мәліметінше, аукциондар геологиялық барлауға инвестиция тартуға, жаңа кен орындарын игеруге және мұнай-газ саласын одан әрі дамытуға бағытталған.