2027 жылы Қазақстанда студенттердің шәкіртақысы қанша болады?
2027 жылы Қазақстандағы студенттер, магистранттар мен докторанттарға төленетін мемлекеттік шәкіртақы мөлшері өзгермейді. Бұл туралы Ғылым және жоғары білім министрлігі мәлімдеді, деп Baspasoz.kz тілшісі Tengrinews.kz-ке сілтеме жасап хабарлайды.
2027 жылғы шәкіртақы мөлшері
Министрліктің мәліметінше, 2027 жылғы 1 қаңтардан бастап мемлекеттік шәкіртақы бұрынғы, яғни 2025–2026 жылдардағы мөлшерде сақталады.
Ай сайын төленетін шәкіртақы көлемі:
бакалавриат студенттеріне – 52 372 теңге;
мемлекеттік білім беру тапсырысы бойынша педагогикалық мамандықтарда оқитын студенттерге – 84 000 теңге;
магистранттарға – 117 098 теңге;
«Денсаулық сақтау» бағыты бойынша білім алып жүрген магистранттар мен резидент дәрігерлерге – 134 664 теңге;
докторанттарға – 262 500 теңге.
Үздік оқитын студенттер қанша алады?
Аралық аттестаттау қорытындысы бойынша барлық пәннен үздік баға алған бакалавриат және магистратура студенттеріне шәкіртақы 15 пайызға көбейтіліп төленеді.
Осыған сәйкес, жоғары шәкіртақы мөлшері шамамен:
бакалавриат студенттеріне – 60 228 теңге;
мемлекеттік тапсырыспен педагогикалық мамандықта оқитын студенттерге – 96 600 теңге;
магистранттарға – 134 663 теңге;
«Денсаулық сақтау» бағыты бойынша оқитын магистранттар мен резидент дәрігерлерге – 154 864 теңге болады.
Бұдан бөлек, жекелеген санаттағы студенттерге мемлекеттік шәкіртақыға қосымша үстеме қарастырылған. Көру және есту қабілеті бойынша мүгедектігі бар студенттердің шәкіртақысы базалық мөлшерден 75 пайызға, ал жетім балалар мен ата-анасының қамқорлығынсыз қалған студенттердің шәкіртақысы 30 пайызға жоғары болады.
Докторанттардың шәкіртақысы 500 мың теңгеден асуы мүмкін
Бұған дейін Ғылым және жоғары білім министрі Саясат Нұрбек алдағы бес жылда студенттердің шәкіртақысын әрі қарай көтеру жоспары бар екенін айтқан еді. Соның ішінде 2030 жылға қарай докторанттардың ай сайынғы шәкіртақысын 500 мың теңгеден асыру көзделіп отыр.
Қазақстанда бұған дейін шәкіртақыны кезең-кезеңімен арттыруға арналған бес жылдық бағдарлама жүзеге асырылды. Бағдарлама аяқталғанымен, 2026 жылғы наурызда Саясат Нұрбек Үкіметтегі брифингте шәкіртақыны көтеру жұмысын қайта жалғастыру жоспарланып отырғанын мәлімдеген.