2027 жылы Қазақстанда зейнетақы мөлшері өседі
Қазақстанда 2027 жылғы 1 қаңтардан бастап зейнетақы төлемдері көбейеді. Бұл туралы Еңбек және халықты әлеуметтік қорғау министрлігі мәлімдеді, деп Baspasoz.kz тілшісі Tengrinews.kz-ке сілтеме жасап хабарлайды.
Ведомствоның мәліметінше, жасына байланысты және еңбек сіңірген жылдары үшін төленетін зейнетақы мөлшері 8,5 пайызға артады. Өсім зейнеткерлердің барлығына қолданылады. Қазақстандағы зейнетақы төлемі базалық, ынтымақты және жинақтаушы бөліктерден тұрады. Базалық зейнетақы мөлшері ең төменгі күнкөріс деңгейіне байланысты есептеледі.
2027 жылы ең төменгі күнкөріс деңгейін 55 173 теңгеге дейін көтеру жоспарланып отыр. Соған сәйкес ең төменгі базалық зейнетақы күнкөріс деңгейінің 70 пайызына дейін өсіп, 38 622 теңгені құрайды. Ал ең жоғары базалық зейнетақы 120 пайызға дейін көтеріліп, 66 208 теңгеге жетеді.
Осы өзгерістерден кейін зейнетақының ең төменгі жиынтық мөлшері 113 541 теңге болады. Оның ішінде:
- базалық бөлігі – 38 622 теңге;
- ынтымақты бөлігі – 74 919 теңге.
Ал ең жоғары жиынтық зейнетақы 259 795 теңгеге дейін жетеді. Оның 66 208 теңгесі базалық, 193 587 теңгесі ынтымақты зейнетақыға тиесілі.
Жинақтаушы зейнетақы қалай өзгереді?
Министрлік мәліметінше, 2027 жылы міндетті, міндетті кәсіптік, ерікті және жұмыс берушінің міндетті зейнетақы жарналарын төлеу тәртібіне өзгеріс енгізу жоспарланбаған. Сондай-ақ жаңа жарна түрлерін енгізу көзделмейді. Қазақстандықтар Бірыңғай жинақтаушы зейнетақы қорындағы жинақтарының бір бөлігін тұрғын үй жағдайын жақсартуға және емделуге жұмсай алады. Ол үшін шоттағы қаражат ең төменгі жеткіліктілік шегінен асуы қажет.
2027 жылы ЕНПФ-дан төленетін жинақтаушы зейнетақының ең төменгі мөлшері 40 063 теңге болады. Ал ең жоғары төлемге шектеу қойылмайды. Оның мөлшері азаматтың зейнетақы жинағына қарай жеке есептеледі.
2027 жылға арналған зейнетақы төлемдеріне қажетті қаражат республикалық бюджеттің 2027–2029 жылдарға арналған жобасында қарастырылған. Құжат қазір Мәжілістің қарауында.