6 қазанда қар жауып, үсік жүреді

6 қазан, сейсенбі күні Қазақстанның басым бөлігінде ауа райы құбылмалы болады. «Қазгидромет» мәліметінше, циклон мен атмосфералық фронттардың әсерінен бірқатар өңірде жаңбыр мен қар күтіледі, деп Baspasoz.kz тілшісі Zakon.kz-ке сілтеме жасап хабарлайды.

Елдің солтүстік-шығысы мен оңтүстік-шығысында жауын-шашын күшейеді. Республика бойынша жел күшейіп, кей жерлерде тұман түседі. Солтүстік өңірлерде жаяу бұрқасын соғуы мүмкін, ал оңтүстікте шаңды дауыл болжанып отыр. Солтүстік-батыс, солтүстік және шығыс аймақтарда көктайғақ болуы ықтимал.

Түнде Алматы, Қызылорда, Түркістан және Жамбыл облыстарының жекелеген аудандарында, сондай-ақ Жетісу облысында ауа температурасы -1…-2 градусқа дейін төмендеп, үсік жүреді.

Бұдан бөлек, бірнеше өңірде өрт қаупі жоғары деңгейде сақталады. Атырау, Маңғыстау, Шығыс Қазақстан, Батыс Қазақстан, Алматы, Ақтөбе облыстарының кей аудандарында, сондай-ақ Жетісу, Қызылорда және Абай облыстарында жоғары өрт қаупі болжанған.

Ал Қызылорда облысында, Ұлытау облысының жекелеген аудандарында, сондай-ақ Түркістан, Ақтөбе, Атырау және Шығыс Қазақстан облыстарының кей бөліктерінде төтенше өрт қаупі сақталады.