8 қазанда Қазақстанның солтүстік, шығыс және орталық өңірлерінде күн райы құбылмалы болады. Кей аймақтарда жаңбыр жауып, шығыста жауын-шашын қарға ұласуы мүмкін. Ал батыс пен оңтүстікте негізінен жауын-шашынсыз ауа райы сақталады, деп Baspasoz.kz тілшісі Ult.kz-ке сілтеме жасап хабарлайды.
Қазгидромет болжамынша, циклон мен атмосфералық фронттардың ықпалынан елдің солтүстігі, шығысы, орталығы және оңтүстік-шығыстағы таулы аудандарда тұрақсыз ауа райы күтіледі. Солтүстік пен орталықта жаңбыр жауса, шығыс аймақтарда жаңбыр мен қар болжанып отыр.
Ел аумағының басым бөлігінде жел күшейіп, кей жерлерде тұман түседі. Шығыс өңірлерде түнгі уақытта көктайғақ болуы мүмкін.
Астана: көшпелі бұлтты, кей уақытта жаңбыр жауады. Түнде ауа температурасы +5…+7°C, күндіз +11…+13°C болады. Оңтүстік-батыстан соғатын желдің жылдамдығы 9-14 м/с, екпіні 15-20 м/с-қа жетеді. Түнде және таңертең желдің екпіні кей уақытта 23 м/с-қа дейін күшеюі ықтимал.
Алматы: көшпелі бұлтты, жауын-шашынсыз. Түнде +7…+10°C, күндіз +17…+19°C болады. Желдің жылдамдығы 3-8 м/с шамасында.
Шымкент: көшпелі бұлтты, жауын-шашын күтілмейді. Түнде +6…+8°C, күндіз +21…+23°C. Оңтүстік-батыстан 7-12 м/с жылдамдықпен жел соғады.
Синоптиктердің болжамынша, 8-10 қазан аралығында елдің солтүстік-батысы, солтүстігі мен орталығында ауа температурасы біртіндеп төмендейді. Кей жерлерде түнгі температура -1…-6°C-қа дейін түсуі мүмкін. Шығыс аймақтарда да салқындап, күндіз ауа температурасы +2…+7°C шамасында болады.
Оңтүстік пен оңтүстік-шығыста жылы ауа райы сақталады. Күндіз термометр бағаны +17…+25°C көрсетеді. Дегенмен таулы аудандарда түнде 2°C-қа дейін үсік жүруі ықтимал.
Батыс өңірлерде жауын-шашын аз болып, ауа температурасы алдағы күндері +22…+27°C-қа дейін көтеріледі.
Мамандар шығыс өңірлердегі көктайғаққа байланысты жүргізушілерге жолда абай болуды, ал тұрғындарға қатты жел мен тұман кезінде сақтық шараларын ұстануды ескертеді.
