Әдебиет және LitTech жобаларына 50 млн теңге грант бөлінеді

Әдебиет, кітап шығару және цифрлық оқу технологиялары саласындағы жобаларды қолдауға арналған грант байқауына өтінім қабылдау аяқталды. Байқауға барлығы 172 креатор өз жобасын ұсынған, деп хабарлайды Baspasoz.kz.

Іріктеу қорытындысы бойынша 10 жеңімпаз анықталып, олардың әрқайсысына 5 млн теңгеден грант беріледі. Осылайша, гранттардың жалпы қоры 50 млн теңгені құрайды.

Байқауға комикс, балалар әдебиеті, көркем әдебиет және өзге де жанрлардағы жобалармен қатар, LitTech бағытындағы цифрлық бастамалар да қабылданды.

Ұйымдастырушылардың мәліметінше, бастама отандық авторлар мен кәсіпкерлердің әдебиет, баспа ісі және цифрлық технологиялар саласындағы идеяларын қолдауға, сондай-ақ жаңа өнімдердің пайда болуына мүмкіндік жасауға бағытталған.

Грант байқауын ҚР Мәдениет және ақпарат министрлігінің қолдауымен Креативті индустрияларды дамыту қоры ұйымдастырып отыр. Байқаудың қорытындысы QazaqCreative цифрлық платформасында жарияланады.