Әйелдер денсаулығы: Скрининг қандай нәтиже берді?
Қазақстанда сүт безі обырын ерте анықтауға арналған тегін тексерулердің нәтижесінде 17 мыңнан астам әйелдің дерті бастапқы кезеңінде белгілі болды. Дәрігерлер ауруды дер кезінде анықтау емнің нәтижелі болуына мүмкіндік беретінін айтады, деп хабарлайды Baspasoz.kz.
15 қазан – Дүниежүзілік сүт безі обырына қарсы күрес күні. Осыған орай елімізде әйелдерді денсаулығына көңіл бөліп, уақытылы тексерілуге шақыратын “Қызғылт қазан” науқаны өтіп жатыр.
Министрліктің мәліметінше, сүт безі обыры Қазақстандағы әйелдер арасында ең жиі кездесетін қатерлі ісік түрі болып отыр. Тек 2025 жылдың өзінде елімізде осы аурудың 5 743 жаңа жағдайы тіркелген. Қазақстанда сүт безі обырын ерте анықтауға арналған мемлекеттік скрининг бағдарламасы 2008 жылдан бері жұмыс істейді. Осы уақыт ішінде тексеру нәтижесінде 19 018 әйелден қатерлі ісік табылған. Олардың 17 186-сында ауру I және II сатыларда анықталған.
Сонымен қатар скрининг кезінде аурудың асқынған, яғни III–IV сатыларда анықталу көрсеткіші төмендеген. Мәселен, 2011 жылы мұндай 66 жағдай тіркелсе, 2025 жылы олардың саны 16-ға дейін азайған.
Тегін тексеруден кімдер өте алады?
Елімізде 40 пен 76 жас аралығындағы әйелдер белгіленген жас кезеңдеріне сәйкес екі жылда бір рет маммографиялық тексеруден тегін өте алады. Ол үшін тіркелген емханасына жүгіну жеткілікті. Маммография сүт безіндегі өзгерістерді аурудың айқын белгілері байқалмай тұрып анықтауға көмектеседі.
“Қызғылт қазан” науқаны аясында еліміздің барлық өңірінде Ашық есік күндері ұйымдастырылып, әйелдерге онколог-маммолог дәрігерлер тегін кеңес беріп жатыр.
2025 жылы осындай шаралар кезінде 8 400-ден астам әйел тексерілген. Олардың 3 337-сінен сүт бездеріне қатысты түрлі аурулар мен өзгерістер анықталып, 144 әйелден қатерлі ісік табылған. Биыл 31 қазанда Қазақ онкология және радиология ғылыми-зерттеу институтында да Ашық есік күні өтеді. Әйелдер осы күні онколог-маммологтың қабылдауына тегін жазылып, маман кеңесін ала алады.
Денсаулық сақтау министрлігі әйелдерді профилактикалық тексерулерді өткізіп алмауға шақырады. Ал сүт безінде түйін, ісіну немесе өзге де өзгеріс байқалса, кезекті скрининг мерзімін күтпей, дәрігерге қаралған жөн.
Мамандардың айтуынша, қатерлі ісікті ерте анықтау емдеудің тиімділігін арттырып, аурудың асқыну қаупін азайтуға көмектеседі.