Алматы нөсер жауынға дайындалып жатыр
Алматыда жауын-шашынға байланысты коммуналдық және төтенше жағдайлар қызметтері күшейтілген жұмыс тәртібіне көшеді. Қала әкімдігінің мәліметінше, су басу қаупінің алдын алу үшін 70 жедел бригада дайындалған, деп Baspasoz.kz тілшісі Tengrinews.kz-ке сілтеме жасап хабарлайды.
Синоптиктердің болжамы бойынша, 1 қазанда сағат 18:00-ден кейін Алматыда аздаған жаңбыр жауып, найзағай ойнайды. Жауын-шашын мөлшері 1-2 миллиметр шамасында болады.
2 қазанға қараған түні және таңғы сағат 09:00-ге дейін жаңбыр мезгіл-мезгіл жалғасады. Бұл уақытта жауын-шашын мөлшері 2-4 миллиметрге жетуі мүмкін. Оңтүстік-батыстан соғатын желдің екпіні секундына 15 метрге дейін күшейеді.
Қалада су жиналуы ықтимал аумақтарда кезекшілік ұйымдастырылды. Бұл жұмыстарға 70 жедел бригада мен 416 жол жұмысшысы жұмылдырылады. Сонымен қатар 252 арнайы техника, 48 мотопомпа және 18 ассенизатор көлігі әзірленген. Су басу қаупі жоғары учаскелерге техника алдын ала орналастырылады. Қажет болған жағдайда пайдалану үшін 2,4 мың құм салынған қап дайындалды. Жауын кезінде қалалық қызметтер күшейтілген тәртіпте жұмыс істейді. Алматының Құтқару қызметі бір ассенизатор көлігі мен 15 мотопомпаны әзірледі. Ал Төтенше жағдайлар департаментінен 240 қызметкер, 53 арнайы техника және 54 мотопомпа жұмылдырылады.
Мамандар су жиналуы мүмкін аумақтарды бақылап, қажет болған жағдайда суды сорып шығарады. Коммуналдық қызметтердің күнделікті жұмысы да тоқтамайды. Қала көшелеріне күн сайын 3 080 жол жұмысшысы мен 1 225 арнайы техника шығады.
Синоптиктердің бұған дейінгі болжамына сәйкес, алдағы күндері Алматыда жаңбыр жауып, жел күшейіп, күн салқындайды. Кейін ауа температурасының қайта көтерілуі күтіледі.-