Алматыда 1 қазаннан бастап су тарифі өзгереді

2026 жылғы 1 қазаннан бастап Алматыда ауыз су мен кәріз қызметінің тарифтері өзгереді. Жаңа тарифтер тұтынушылар санатына қарай белгіленген, деп Baspasoz.kz тілшісі Kazinform.kz-ке сілтеме жасап хабарлайды.

Жеке тұлғалар үшін ауыз судың бір текше метрі ҚҚС-пен бірге 178,06 теңге болады. Ал кәріз қызметінің тарифі бір текше метрге 119,46 теңге болып белгіленді.

Кәсіпкерлер мен заңды тұлғалар судың бір текше метрі үшін 362,18 теңге, ал кәріз қызметіне 264,75 теңге төлейді. Екі қызметтің жалпы құны ҚҚС-пен бірге 626,93 теңгені құрайды.

Мемлекеттік мекемелер үшін ауыз судың бір текше метрі 649,60 теңге, ал кәріз қызметі 189,14 теңге болады.

Сонымен қатар 1 қазаннан бастап су есептегіші жоқ тұтынушылар үшін де төлем мөлшері өзгереді.

Есептегіші жоқ тұрғындар тұрмыстық және санитарлық-гигиеналық қажеттілікке пайдаланатын су үшін айына бір адамға 2 670,90 теңге төлейді. Бұл сомаға ҚҚС қосылған.

Ал су есептегішін орнатуға техникалық мүмкіндік жоқ ескі және апатты үйлер мен жатақханалардың тұрғындары үшін төлем бір адамға айына 956,19 теңге болады.

Есептегіші жоқ тұтынушылардан пайдаланылған салқын суды кәріз жүйесіне жіберу үшін айына бір адамға 1 791,85 теңге, ал ыстық су үшін 376,29 теңге алынады.

Бұдан бөлек, ағаштар, көгалдар, гүлзарлар және басқа да жасыл желектерді суаруға арналған тариф бекітілді. Бір сотық жерді суару ақысы ҚҚС-пен бірге айына 1 780,60 теңгені құрайды.

«Алматы Су» мәліметінше, жаңа тарифтер 2026 жылғы 1 қазаннан бастап қолданысқа енгізіледі.