Алматыда LRT желісінің алғашқы рельстері төселіп жатыр
Алматыда жеңіл рельсті көлік жүйесінің (LRT) алғашқы желісін салу жұмыстары жалғасып жатыр. Қазір жұмысшылар болашақ бағыттың алғашқы рельстерін төсеп, жол құрылымын қалыптастыруда, деп Baspasoz.kz тілшісі Kazinform.kz-ке сілтеме жасап хабарлайды.
Бірінші LRT желісінің ұзындығы 18,3 шақырым болады. Бағыт Бауыржан Момышұлы көшесі арқылы Төле би көшесіне, одан әрі Абылай хан даңғылына шығып, Алматы-2 теміржол вокзалына дейін жалғасады. Сондай-ақ желі Алатау ауданындағы Индустриялық аймаққа дейін барады.
Қазіргі таңда негізгі құрылыс жұмыстары Бауыржан Момышұлы және Төле би көшелерінде жүргізіліп жатыр. Мұнда болашақ бағыттың трассасы дайындалып, құрылыс аумағына кіретін инженерлік желілер қайта орналастырылуда.
Жоба аясында жалпы 375 инженерлік коммуникацияны қайта құру жоспарланған. Олардың қатарында жылу, байланыс, су құбыры мен кәріз, нөсер кәрізі, газ және электр желілері бар.
Жобаға LRT желісінен бөлек, жаңа трамвай депосының құрылысы да кіреді. Депо Индустриялық аймақта салынады. Алматы әкімдігінің мәліметінше, нысан Алатау ауданында Фариза Оңғарсынова, Мөңке би және Бауыржан Момышұлы көшелерінің арасында орналасады.
Жаңа желі деподан Момышұлы көшесі арқылы Төле би көшесіне, одан шығыс бағытта Абылай хан даңғылына өтеді. Кейін солтүстікке қарай бұрылып, Алматы-2 вокзалына дейін жетеді.
LRT қаланың жаңартылатын қоғамдық көлік жүйесінің бір бөлігі ретінде басқа көлік түрлерімен байланыстырылмақ.
Алматы әкімдігінің бұған дейінгі мәліметінше, алғашқы LRT желісін 2027 жылдың соңында іске қосу жоспарланып отыр.