Астана мен 16 өңірде дауылды ескерту жарияланды
19 қыркүйекте Қазақстанның 16 өңірі мен Астанада қолайсыз ауа райына байланысты дауылды ескерту жарияланды. Бұл туралы «Қазгидромет» мәлімдеді, деп Baspasoz.kz тілшісі Kazinform.kz-ке сілтеме жасап хабарлайды.
Астанада өрт қаупі жоғары деңгейде сақталады.
Абай облысының солтүстігінде түнде және таңертең тұман түседі. Таңертең және күндіз облыстың солтүстігі, оңтүстігі мен орталығында оңтүстік-шығыстан соққан жел солтүстік-шығысқа ауысып, жылдамдығы 15-20, екпіні 23 м/с-қа дейін жетеді. Өңірде өрт қаупі жоғары, ал солтүстік-батыс пен оңтүстікте өте жоғары деңгейде болады.
Атырау облысының солтүстігі мен шығысында түнде және таңертең тұман күтіледі. Оңтүстігінде өрт қаупі өте жоғары.
Ақмола облысының батысы мен солтүстігінде түнде және таңертең тұман түседі. Батыс пен солтүстікте солтүстік-батыс желінің екпіні 15-20 м/с-қа жетеді. Оңтүстік, солтүстік, шығыс және орталық аудандарда өрт қаупі жоғары деңгейде сақталады.
Ақтөбе облысының батысы мен солтүстігінде түнде және таңертең тұман болады. Күндіз облыстың шығысы мен оңтүстігінде солтүстік және солтүстік-шығыс желі соғып, екпіні 15-18 м/с-қа жетеді. Батыс, оңтүстік және орталық бөліктерде өрт қаупі өте жоғары.
Шығыс Қазақстан облысының солтүстігінде түнде және таңертең тұман түседі. Таңертең және күндіз солтүстік, оңтүстік және орталық аудандарда шығыс, оңтүстік-шығыс желінің жылдамдығы 15-20, екпіні 23 м/с болады. Батыс, шығыс және оңтүстікте өрт қаупі жоғары, ал оңтүстік-шығыста өте жоғары деңгейде сақталады.
Жамбыл облысының таулы аймақтарында күндіз жаңбыр жауып, найзағай ойнайды. Оңтүстік-батыс, солтүстік-шығыс және таулы аудандарда желдің екпіні 15-20 м/с-қа жетеді. Өңірде өрт қаупі өте жоғары.
Жетісу облысында Алакөл көлдері маңында шығыстан соққан желдің екпіні 15-20, кей уақыттарда 25 м/с-қа дейін күшейеді.
Батыс Қазақстан облысының батысы мен солтүстігінде түнде және таңертең тұман түседі.
Қарағанды облысында өрт қаупі жоғары деңгейде. Батыс бөлігінде бұл көрсеткіш өте жоғары болады.
Қостанай облысының батысы мен солтүстігінде түнде және таңертең тұман күтіледі. Күндіз оңтүстік және шығыс аудандарда солтүстік желдің екпіні 15-20 м/с-қа жетеді.
Қызылорда облысының солтүстігі, оңтүстігі мен орталығында жаңбыр жауып, найзағай ойнайды. Күндіз солтүстік, оңтүстік және орталық аудандарда солтүстік-батыс желінің екпіні 15-20 м/с болады. Облыс бойынша өрт қаупі өте жоғары.
Маңғыстау облысының оңтүстігінде солтүстік-шығыстан соққан желдің екпіні 15-20 м/с-қа дейін жетеді. Солтүстік және орталық аудандарда өрт қаупі жоғары, ал солтүстік-шығыста өте жоғары деңгейде сақталады.
Павлодар облысының солтүстігінде түнде тұман түседі. Батыс, солтүстік және оңтүстікте солтүстік-батыс желінің екпіні 15-20 м/с болады. Өңірде өрт қаупі жоғары.
Солтүстік Қазақстан облысының солтүстігі, шығысы мен оңтүстігінде түнде жаңбыр жауып, найзағай ойнайды. Батыс пен солтүстікте түнде және таңертең тұман күтіледі. Күндіз оңтүстікте солтүстік-батыс желінің екпіні 15-20 м/с-қа жетеді. Оңтүстік пен шығыста өрт қаупі жоғары.
Түркістан облысының таулы аймақтарында күндіз өткінші жаңбыр жауып, найзағай ойнайды. Солтүстік-шығыс желінің екпіні 15-20 м/с болады. Өңірде өрт қаупі өте жоғары.
Ұлытау облысының батысы, солтүстігі мен оңтүстігінде жаңбыр, найзағай, бұршақ күтіледі. Шығысында аздаған жаңбыр жауып, найзағай ойнайды. Облыста өрт қаупі өте жоғары деңгейде сақталады.