«Қазгидромет» Астана мен Алматы қалаларына 24–26 қыркүйекке арналған жаңартылған ауа райы болжамын жариялады, деп Baspasoz.kz тілшісі Tengrinews.kz-ке сілтеме жасап хабарлайды.
Бұған дейін Алматыда 25 қыркүйекте жаңбыр жауып, найзағай ойнайды деп болжанған еді. Алайда жаңа мәлімет бойынша, алдағы үш күнде қалада жауын-шашын күтілмейді. Ал Астанада 25 қыркүйекте жаңбыр жауып, жел күшейеді.
Астанадағы ауа райы
24 қыркүйекте күн аз бұлтты, жауын-шашынсыз болады. Солтүстік-шығыстан соққан желдің жылдамдығы түнде секундына 2–7 метр, күндіз 5–10 метрге жетеді. Ауа температурасы түнде +5...+7, күндіз +19...+21 градус болады.
25 қыркүйекте күн құбылмалы бұлтты. Таңертең және күндіз жаңбыр жауады. Солтүстік-шығыстан секундына 9–14 метр жылдамдықпен жел соғып, күндіз екпіні 15–20 метрге дейін күшейеді. Түнде +8...+10, күндіз +13...+15 градус күтіледі.
26 қыркүйекте жауын-шашын болмайды. Солтүстік-шығыстан соққан желдің жылдамдығы секундына 9–14 метр, екпіні 15–20 метрге дейін жетеді. Ауа температурасы түнде +4...+6, күндіз +11...+13 градус болады.
Алматыда жаңбыр жаумайды
24 қыркүйекте күн құбылмалы бұлтты, жауын-шашынсыз болады. Жел секундына 3–8 метр жылдамдықпен соғады. Түнде ауа температурасы +12...+14, күндіз +25...+27 градусқа дейін көтеріледі.
25 қыркүйекте де жауын-шашын күтілмейді. Түнде +12...+14, күндіз +23...+25 градус болады.
26 қыркүйекте күн құбылмалы бұлтты әрі құрғақ болады. Ауа температурасы түнде +11...+13, күндіз +21...+23 градус шамасында сақталады.
Осылайша, Алматыда алдағы үш күн жауын-шашынсыз өтеді. Астанада 25 қыркүйекте жаңбыр жауып, күн айтарлықтай салқындайды.
Жалпы Қазақстан бойынша да ауа райының салқындауы күтіледі. Синоптиктер бірқатар өңірде жаңбыр, найзағай мен қатты жел болатынын, ал солтүстік аймақтарда түнгі уақытта үсік жүруі мүмкін екенін ескертті.
