«Қазгидромет» Астана мен Алматы қалаларында 3–5 қазан аралығында ауа райы қандай болатынын мәлімдеді, деп Baspasoz.kz тілшісі Tengrinews.kz-ке сілтеме жасап хабарлайды.
Синоптиктердің болжамынша, алдағы күндері екі қалада да ауа райы айтарлықтай өзгереді. Астанада жаңбыр соңы қарға ұласып, қатты жел соғады. Ал Алматыда күн алдымен +27 градусқа дейін жылығанымен, артынша температура күрт төмендейді.
Астана
3 қазанда күн құбылмалы бұлтты болады. Кешке қарай аздап жаңбыр жауады. Оңтүстік-батыстан соғатын желдің жылдамдығы секундына 9–14 метрге жетеді. Түнде +9...+11, күндіз +19...+21 градус болады.
4 қазанда түнде жаңбыр жауып, кешке қарай жаңбыр қарға ұласады. Жел екпіні күндіз секундына 15–20 метрге, кей уақытта 25 метрге дейін күшейеді. Түнде +5...+7, күндіз +8...+10 градус болып, кейін ауа температурасы одан әрі төмендейді.
5 қазанда елордада жаңбыр мен қар жауады. Желдің жылдамдығы секундына 15–20 метр, екпіні 23–28 метрге жетеді. Күндіз кей уақытта секундына 30 метрден де асуы мүмкін. Түнде 0...+2, күндіз +3...+5 градус күтіледі.
Алматы
3 қазанда жауын-шашын болмайды. Түнде ауа температурасы +9...+11, күндіз +22...+24 градус болады. Жел секундына 3–8 метр жылдамдықпен соғады.
4 қазанда да күн ашық әрі жауын-шашынсыз болады. Түнде +12...+14, күндіз +25...+27 градусқа дейін жылынады.
Алайда 5 қазанда ауа райы күрт өзгереді. Жаңбыр жауып, түнде жауын күшейеді. Солтүстік-батыстан соғатын желдің екпіні кей уақытта секундына 15–18 метрге жетеді. Түнде +8...+10, күндіз небәрі +12...+14 градус болады.
Бұған дейін синоптиктер 3–5 қазан аралығында Қазақстанға солтүстік циклон әсер ететінін хабарлаған. Соның салдарынан елдің бірқатар өңірінде жаңбыр мен қар жауып, көктайғақ болып, жел күшейеді.
