Астанада UNICEF Charity Run қайырымдылық марафоны өтеді
20 қыркүйекте Астанадағы Ботаникалық бақта UNICEF Charity Run 2026 қайырымдылық жүгіру марафоны өтеді. Іс-шараны БҰҰ Балалар қоры (ЮНИСЕФ) ұйымдастырады, деп хабарлайды Baspasoz.kz.
Марафонның негізгі мақсаты: балаларды қолдау және Қазақстанда инклюзивті қоғам қалыптастыруға үлес қосу. Қатысушылардан жиналған қаражат ЮНИСЕФ-тің осы бағыттағы бағдарламаларын жүзеге асыруға жұмсалады.
UNICEF Charity Run бұған дейін әлемнің бірнеше ірі қаласында өткізіліп келген. Астана биыл бұл халықаралық бастамаға алғаш рет қатысып отыр. Марафонға кәсіби спортшылармен қатар әуесқойлар, балалар, ересектер және отбасылар қатыса алады.
Қатысушыларға 2, 5 және 10 шақырымдық үш қашықтық ұсынылады. 2 шақырымдық жарысқа 7-15 жас аралығындағы балалар қатысады және олар үшін тіркелу тегін. Ал 5 және 10 шақырымдық қашықтықтарға 16 жастан асқан азаматтар жіберіледі.
Жарыс бағдарламасы 20 қыркүйекте сағат 08:00-де басталады. 10 шақырымдық жүгіру сағат 09:00-де, 5 шақырымдық жарыс 09:10-да, ал балалар арасындағы 2 шақырымдық жүгіру 09:15-те өтеді. Балаларға арналған ойын-сауық бағдарламасы 08:30-дан 12:00-ге дейін ұйымдастырылады.
Қатысушылардың жүгіру жиынтықтары 18-19 қыркүйекте сағат 09:00-ден 20:00-ге дейін Qazaqstan жеңіл атлетика спорт кешенінде беріледі. Басқа қалалардан келетін қатысушылар жиынтықтарын жарыс күні, 20 қыркүйекте, сағат 07:00-ден 08:00-ге дейін ала алады.
Іс-шараны ҚР Туризм және спорт министрлігі, Астана қаласының әкімдігі, Спортты қолдау қоры және Қазақстандағы ЮНИСЕФ бірлесіп ұйымдастырады.
5 және 10 шақырымдық қашықтықтарға қатысу үшін Freedom Ticketon платформасы арқылы тіркелуге болады.