Қар, аяз және +30°C: қазан айында күн құбылмалы
«Қазгидромет» РМК 2026 жылғы қазан айына арналған нақтыланған консультативтік ауа райы болжамын жариялады. Синоптиктердің мәліметінше, биыл қазан айы әдеттегіден жылырақ болғанымен, ауа райы құбылмалы болады. Кей өңірлерде қар жауып, түнгі температура -10 градусқа дейін төмендесе, айдың жекелеген күндері оңтүстікте күн қайта ысып, +30 градусқа дейін жетуі мүмкін, деп Baspasoz.kz тілшісі Zakon.kz-ке сілтеме жасап хабарлайды.
Қазан айының алғашқы күндері ел аумағында күндіз ауа температурасы негізінен +15...+25 градус шамасында болады. Алайда кейін солтүстіктен келген циклонның әсерінен Қазақстанның барлық өңірінде жаңбыр мен қар түріндегі жауын-шашын күтіледі.
Жел күшейіп, екпіні секундына 15-28 метрге дейін жетуі ықтимал. Елдің солтүстік бөлігінде жаяу бұрқасын болуы мүмкін. Арктикалық суық ауа массаларының енуіне байланысты тұман түсіп, көктайғақ болып, үсік жүруі ықтимал.
Осы кезеңде ауа температурасы айтарлықтай төмендейді. Батыс пен солтүстік-батыста түнде -6...+5 градус, күндіз +2...+11 градус болады. Солтүстік, шығыс және орталық өңірлерде түнде -1...-6 градусқа дейін суытып, күндіз 0...+8 градус шамасында болады.
Оңтүстік пен оңтүстік-шығыста түнгі температура 0...+5 градус, күндіз +10...+15 градус болады деп болжанып отыр. Таулы аудандарда түнде сынап бағанасы -2...-10 градусқа дейін төмендеп, күндіз +5...+10 градус шамасында сақталады.
Алайда суық ұзаққа созылмайды. Қазанның алғашқы онкүндігінің екінші жартысында Орталық Азия мен Жерорта теңізінің шығыс жағалауынан жылы ауа массалары келеді. Соның әсерінен елдің басым бөлігінде күндізгі температура +15...+20 градусқа дейін көтеріледі. Оңтүстік-батыс пен оңтүстік өңірлерде +18...+28 градусқа дейін жылынады.
Қазанның екінші жартысында ауа райы қандай болады?
Айдың екінші және үшінші онкүндігінде температура жиі құбылады.
Батыс және солтүстік-батыс өңірлерде түнде температура +5...+12 градустан -5...+5 градусқа дейін өзгерсе, күндіз +10...+28 градус аралығында болады.
Солтүстік, орталық және шығыс аймақтарда түнде +3...+8 градустан -1...-8 градусқа дейін төмендеуі мүмкін. Күндіз ауа температурасы +3...+23 градус аралығында құбылады.
Елдің оңтүстік бөлігінде түнде +5...+10 градустан -3...+5 градусқа дейін төмендеп, күндіз +15...+30 градусқа дейін жылынады. Кей кезеңдерде түнде -1...-6 градус, ал күндіз +10...+15 градус болуы ықтимал.
Жалпы, қазан айындағы орташа ауа температурасы Қазақстанның басым бөлігінде климаттық нормадан 1-2 градус жоғары болады деп күтіледі. Шығыс Қазақстан облысында, сондай-ақ Павлодар облысының солтүстік-шығыс бөлігі мен Абай облысында температура климаттық норма шамасында болады.
Жауын-шашын мөлшері елдің басым бөлігінде көпжылдық орташа көрсеткішке жуық болады деп болжанған.
«Қазгидромет» мамандары айлық болжамның консультативтік сипатта екенін ескертеді. Синоптикалық жағдайдың өзгеруіне қарай болжам қайта қаралып, онкүндік ауа райы болжамдарымен нақтыланып отырады.