Қарағанды облысында 300 млн теңге жеңілдетілген несие жымқырылған

Қарағанды облысында көктемгі егіс және күзгі жиын-терім жұмыстарына арналған 300 млн теңге несие қаражаты мақсатсыз пайдаланылған. Қаржы «Кең Дала 2» бағдарламасы аясында бөлінген, деп Baspasoz.kz тілшісі Zakon.kz-ке сілтеме жасап хабарлайды.

Қаржылық мониторинг агенттігінің мәліметінше, 2025 жылдың мамыр айында «Аграрлық несие корпорациясы» АҚ филиалы мен «Рашан» ЖШС арасында айналым қаражатын толықтыруға арналған несие шарты жасалған. Міндеттемелердің орындалуына «Даму» кәсіпкерлікті дамыту қоры кепілдік берген.

Келісім талаптарына сәйкес, «Рашан» ЖШС шотына 300 млн теңге аударылған. Кейін бұл қаражат егіс науқанына қажетті шығындарды өтеу ретінде екі серіктестікке бөлініп берілген.

Атап айтқанда, 148 млн теңгеге жуық қаражат тұқым сатып алуға, ал 152 млн теңге ауыл шаруашылығы техникасын жалдауға, жанар-жағармай мен жұмысшылардың еңбекақысын төлеуге жұмсалғаны көрсетілген.

Алайда тексеру барысында тұқым сатып алынбағаны, техника жалданбағаны және көрсетілген жер учаскелеріне ауыл шаруашылығы дақылдары егілмегені анықталған.

«Рашан» ЖШС директоры күдікті деп танылды. Сот санкциясымен оның активтеріне тыйым салынды.

Қылмыстық іс бойынша тергеу жалғасып жатыр.