Kaspi.kz қосымшасында жол ережесін бұзғаны үшін салынған айыппұлға қатысты бейнежазбаны көруге мүмкіндік беретін жаңа сервис іске қосылды. Жоба Kaspi.kz пен Қазақстан Республикасы Бас прокуратурасының Құқықтық статистика және арнайы есепке алу жөніндегі комитеті бірлесіп жүзеге асырды, деп Baspasoz.kz тілшісі Zakon.kz-ке сілтеме жасап хабарлайды.
Бейнежазбаны айыппұл төлеу парақшасы арқылы сұратуға болады. Өтініш мемлекеттік орган тарапынан өңделгеннен кейін Kaspi.kz қосымшасына тиісті хабарлама келеді.
Сұратылған бейнежазба қосымшада жеті күн бойы қолжетімді болады. Айыппұл төленгеннен кейін де бейнені төлемдер тарихы бөлімінен қайта көруге болады.
Kaspi.kz мәліметінше, компанияның сервистерін Қазақстан мен Түркияда 26 миллионнан астам клиент және шамамен 1 миллион серіктес пайдаланады. Қазақстанда Kaspi.kz суперқосымшасы төлемдер, электронды сауда, онлайн-супермаркет, қаржылық қызметтер, саяхат, хабарландырулар және мемлекеттік қызметтерді қоса алғанда, күнделікті қажетті бірқатар сервисті біріктіреді.
Ал Түркияда Kaspi.kz елдегі ірі электронды сауда платформаларының бірі саналатын Hepsiburada компаниясына иелік етеді.
