Қазақстан ЖИ дағдылары индексінде әлемде 55-орын алды
Қазақстан Coursera ұсынған AI-Human Skills Synergy Index 2026 рейтингінде 98 елдің арасынан 55-орын алды. Бұл көрсеткіш Coursera Global Skills Report 2026 жаһандық есебінің аясында жарияланды, деп хабарлайды Baspasoz.kz.
Жаңа индекс адамдардың жасанды интеллект саласындағы білімін адами дағдылармен қаншалықты қатар дамытып жатқанын бағалайды. Олардың қатарында сыни ойлау, көшбасшылық, қарым-қатынас жасау және күрделі мәселелерді шешу қабілеті бар. Бағалау кезінде онлайн білім алушылардың жаңа дағдыларды меңгеру белсенділігімен қатар, оларды ел көлемінде қолдануға жасалған жағдайлар да ескеріледі. Қорытынды көрсеткіш дағдыларды игеру деңгейі, меңгеріліп жатқан құзыреттердің ауқымы және ЖИ мен адами қабілеттердің өзара үйлесіміне негізделеді.
Сондай-ақ есепте Oxford Insights әзірлеген Government AI Readiness Index деректері пайдаланылған. Бұл рейтинг елдердің жасанды интеллект мүмкіндіктерін қолдануға қаншалықты дайын екенін мемлекеттік саясат, инфрақұрылым, адами капитал және ЖИ индустриясының даму деңгейі секілді бірқатар көрсеткіш бойынша бағалайды.
Ғылым және жоғары білім министрі Саясат Нұрбектің айтуынша, Қазақстанда AI-Sana ұлттық бағдарламасын іске асыру кезінде тек цифрлық курстарға қолжетімділік берумен шектелмей, алынған білімді оқу үдерісіне енгізуге және тәжірибеде қолдануға басымдық берілген. Қазір бағдарламаға 100 жоғары оқу орны қатысып отыр. Олар онлайн курстарды білім беру үдерісіне енгізу, нәтижелерді бақылау және ЖИ технологияларының дамуына қарай оқу бағдарламаларын жаңарту бағытында жұмыс жүргізуде.
Сонымен бірге оқытушылардың цифрлық және педагогикалық біліктілігін арттыруға көңіл бөлінген. Министрлік мәліметінше, 1 200-ден астам педагог заманауи онлайн оқыту әдістерін меңгеріп, 35 авторлық курсты әзірлеуге атсалысқан.
Қазақстанның рейтингтегі нәтижесі Coursera қолданушылары арасында ЖИ-ге қатысты техникалық біліммен бірге оны тиімді пайдалануға қажетті адами дағдыларды дамытуға да қызығушылық бар екенін көрсетеді.
Дегенмен рейтинг нәтижесін бүкіл ел халқының дағды деңгейінің тікелей көрсеткіші ретінде қарастыруға болмайды. Себебі Coursera деректері негізінен осы платформаны пайдаланатын адамдардың оқу белсенділігіне сүйенеді. Сондықтан индекс цифрлық білім алушылар арасындағы ЖИ және адами дағдылардың даму үрдісін көрсететін қосымша халықаралық көрсеткіш саналады.