Қазақстанда азық-түлік инфляциясы 8,5%-ға жетті

2026 жылдың қыркүйегінде Қазақстандағы жылдық инфляция 9,3%-ды құрады. Ұлттық статистика бюросының дерегіне сәйкес, азық-түлік тауарлары бір жыл ішінде 8,5%-ға қымбаттаған. Ал бір айдағы инфляция тамыздағы деңгейде қалып, 0,6% болды, деп хабарлайды Baspasoz.kz.

Соған қарамастан, қыркүйекте бірқатар азық-түлік өнімдері айтарлықтай арзандады. Пияз бағасы бір айда 20,7%-ға, лимон 13,9%-ға, сәбіз 13,6%-ға, картоп 13,4%-ға, баялды 11,2%-ға, қырыққабат 10,1%-ға төмендеді. Сондай-ақ тәтті бұрыш, алма, алмұрт, сарымсақ пен банан арзандаған. Балалар тағамына арналған жарма бағасы 6,1%-ға, қант 1,3%-ға түсті.

Кейбір жеміс-көкөністің бағасы былтырғы қыркүйекпен салыстырғанда да төмен. Мәселен, алма 11,1%-ға, лимон 8,3%-ға, қызылша 6,9%-ға, қырыққабат 6,1%-ға, банан 5,6%-ға, тәтті бұрыш 3,9%-ға арзандаған.

Сауда және интеграция министрлігі азық-түлік бағасын тұрақтандыру үшін ішкі нарықты қажетті өніммен қамтамасыз ету, тауарды өндірушіден тікелей жеткізу, делдалдар санын қысқарту және сауда үстемесін бақылау шаралары жүргізіліп жатқанын хабарлады.

Жыл басынан бері тікелей жеткізу тетігі арқылы ішкі нарыққа шамамен 33,2 мың тонна картоп, 13,9 мың тонна сәбіз, 4,7 мың тонна пияз және 177,7 тонна ақ қырыққабат жеткізілген. Өнімдердің едәуір бөлігі Қытай, Өзбекстан және өңірдегі өзге елдерден әкелінді. Бағаны тежеу үшін тұрақтандыру қорлары мен «айналым схемасы» да пайдаланылып отыр. Өңірлік комиссиялар тауар құнының өсуіне ықпал ететін өнімсіз делдалдарды жеткізу тізбегінен шығару жұмыстарын жүргізуде. Жыл басынан бері комиссиялар 816 отырыс өткізіп, 3 391 заңбұзушылықты анықтаған. Нәтижесінде 222 өнімсіз делдал жеткізу тізбегінен шығарылды.

Әлеуметтік маңызы бар азық-түлік тауарларына қойылатын сауда үстемесі 15%-дан аспауға тиіс. Осы талапты бұзу деректері бойынша жыл басынан бері 3 610 әкімшілік қаулы шығарылған.

Өнім өндірушілер мен жеткізушілердің шығынын азайтуға бағытталған шаралар да қабылдануда. Маусымнан бастап әлеуметтік маңызы бар азық-түлік өнімдерін, сондай-ақ ұн тарту және нан пісіру кәсіпорындарына арналған бидайды теміржолмен тасымалдауға төмендетілген коэффициент енгізілді. Бұл тасымал құнын 40%-ға дейін азайтуға мүмкіндік береді.

Сонымен қатар бағаны тұрақтандыру жөнінде міндеттеме алған әлеуметтік маңызы бар тауар өндірушілер үшін электр энергиясының тарифін төмендету мүмкіндігі қарастырылған.

Министрлік азық-түлік бағасын тұрақтандыру жұмыстары жалғасатынын мәлімдеді. Негізгі назар инфляцияға едәуір ықпал ететін тауарлардың бағасына және ішкі нарықты қажетті өнімдермен үздіксіз қамтамасыз етуге аударылмақ.