Қазақстанда азаматтардың медициналық көмекті қашықтан алу мүмкіндігін кеңейту ұсынылып отыр. Жаңа ережеде дәрігердің қайталама қабылдауынан бөлек, УДЗ, КТ, МРТ, ЭКГ және басқа да зерттеу нәтижелерін қашықтан талдау қарастырылған, деп Baspasoz.kz тілшісі Tengrinews.kz-ке сілтеме жасап хабарлайды.
Тиісті құжат тамыз айында «Ашық НҚА» порталында қоғамдық талқылауға жарияланды. Қазір ереже әлі түпкілікті бекітілген жоқ.
Денсаулық сақтау министрлігінің Электронды денсаулық сақтауды дамыту департаменті ақпараттандыру саясаты басқармасының басшысы Руслана Егизбаеваның айтуынша, бұған дейін заңнама қашықтан кеңес беруге тыйым салмаған. Алайда онлайн көрсетілетін медициналық қызметтердің нақты тізімі болмаған.
Жаңа құжатта қашықтан көрсетуге болатын 166 медициналық қызмет белгіленген.
Қай қызметтерді онлайн алуға болады?
Жаңа тәртіп бойынша дәрігердің қайталама қабылдауын қашықтан өткізуге мүмкіндік беріледі. Оның ішінде терапевт, педиатр, жалпы тәжірибелік дәрігер, акушер-гинеколог, хирург, уролог, эндокринолог, офтальмолог және басқа да бейінді мамандардың кеңесі бар.
Сонымен қатар бірқатар медициналық зерттеудің нәтижесін онлайн талдауға болады. Олардың қатарында:
- ЭКГ;
- электроэнцефалограмма;
- КТ және МРТ;
- рентген зерттеулері;
- ішкі ағзалар, қан тамырлары мен жұмсақ тіндердің УДЗ нәтижелері бар.
Бұл мүмкіндік әсіресе ауыл тұрғындары үшін маңызды. Мысалы, ауылдық амбулаторияда қажетті зерттеу жүргізілгенімен, оны талдайтын кардиолог немесе радиолог болмаса, медициналық қызметкер зерттеу нәтижелерін басқа мекемедегі маманға жібере алады. Дәрігер қорытындыны қашықтан жасап, науқасқа қайтадан аудан орталығына барудың қажеті болмайды.
Алғашқы қабылдау онлайн өтпейді
Мұнда маңызды талап бар: пациенттің алғашқы қабылдауы қашықтан жүргізілмейді.
Алдымен адам медициналық ұйымға барып, дәрігердің қарауынан өтуі керек. Маманды тексеріп, қажетті талдаулар мен зерттеулерді тағайындайды. Ал нәтижелер дайын болғаннан кейінгі қайталама қабылдауды онлайн өткізуге болады. Оның форматын дәрігер мен пациент өзара келіседі.
Онлайн қабылдауға қалай жазылады?
Дистанциялық қабылдауды тек арнайы цифрлық медициналық жүйелер арқылы өткізуге болады. Мысалы, пациент медициналық қосымша арқылы қабылдауға жазылған кезде онлайн немесе офлайн форматтың бірін таңдай алады. Дәрігермен WhatsApp немесе Telegram арқылы медициналық кеңес алуға болмайды. Министрлік мұндай платформаларды медициналық ақпаратпен жұмыс істеуге қауіпсіз деп санамайды. Бұған дейін мамандардың WhatsApp, Skype және Zoom сияқты сервистерді қолданған жағдайлары анықталған.
Министрлік медициналық ұйымдардың рұқсат етілген цифрлық жүйелерді пайдалануын бақылауды күшейтуді жоспарлап отыр. Қашықтан көрсетілген қызметтердің ақысы да тиісті талаптар сақталған жағдайда ғана төленеді.
Биыл 2,5 миллионнан астам онлайн қабылдау өткізілген
Денсаулық сақтау министрлігінің мәліметінше, тамыз айының соңына қарай жыл басынан бері дәрігерлердің қашықтан өткізген қабылдауы 2 594 982-ге жеткен. Бұл қашықтан көрсетуге болатын медициналық қызметтердің жалпы санының 9,3 пайызы. Қазіргі таңда онлайн қабылдаулардың басым бөлігі терапевт және басқа да мамандардың консультацияларына тиесілі. Ал УДЗ, КТ, МРТ және басқа зерттеулерді қашықтан талдау қызметтері әлі кең таралмаған. Жаңа ереженің мақсаты – осы бағытты да дамыту.
Жаңа ереже қашан күшіне енеді?
Құжатты тиісті министрліктер мақұлдаған. Қазір ол Әділет министрлігінде тіркеу рәсімінен өтіп жатыр. Жаңа тәртіпті жақын уақытта бекіту жоспарланған.
