Қазақстанда қатты пайдалы қазбаларды өндіруге роялти енгізу мерзімі 2027 жылдан 2029 жылға ауыстырылуы мүмкін. Бұл ұсынысты Үкімет жанындағы Салық кодексін енгізу жөніндегі жобалық кеңсе отырысына қатысушылар қолдады, деп Baspasoz.kz тілшісі Kazinform.kz-ке сілтеме жасап хабарлайды.
Мәселе Премьер-министрдің орынбасары – Ұлттық экономика министрі Серік Жұманғарин төрағалық еткен жобалық кеңсенің 28-отырысында қаралды. Жиында қатты пайдалы қазбаларды өндіруге салық салу және проблемалық несиелер мен шағын қарыздар бойынша берешегі кешірілген азаматтарды жеке табыс салығынан босату мәселелері талқыланды.
Өнеркәсіп және құрылыс министрлігі роялтиді енгізу мерзімін кейінге қалдыруды ұсынды. Қолданыстағы жаңа Салық кодексіне сәйкес, төлемді 2027 жылғы 1 қаңтардан бастап енгізу көзделген. Ол 2026 жылғы 31 желтоқсаннан кейін берілген лицензиялар негізінде бұрын жер қойнауын пайдалану құқығы берілмеген аумақтардан өндірілген минералдық шикізат пен қатты пайдалы қазбаларға, соның ішінде өңдеуден өткен өнімдерге қатысты болмақ.
Министрлік өкілдерінің айтуынша, техногендік минералдық түзілімдер үшін салық салынатын базаны анықтау, роялтиді әкімшілендіру және жаңа лицензиялардың ерекшеліктерін ескере отырып мөлшерлемелерді белгілеу мәселелері әлі де пысықтауды қажет етеді. Бұл бағытта салалар арасында келісу жүргізіп, кәсіпорындардың қаржылық-экономикалық модельдері негізінде есептеулер жасау қажет.
Талқылау қорытындысында роялтиді енгізу мерзімін 2027 жылғы 1 қаңтардан 2029 жылғы 1 қаңтарға ауыстыру қолдау тапты.
