Қазақстанда сүт өндірісі артты

Қазақстанда өңделген сүт өндірісі бір жылда аздап өсті. 2026 жылдың қаңтар-тамыз айларында елімізде 441,3 мың тонна өнім шығарылды. Бұл өткен жылдың сәйкес кезеңіндегі көрсеткіштен 0,2%-ға жоғары. 2025 жылдың алғашқы сегіз айында өндіріс көлемі 440,5 мың тоннаны құраған, деп хабарлайды Baspasoz.kz.

Өңірлер арасында ең көп өңделген сүт Солтүстік Қазақстан облысында өндірілді – 120,8 мың тонна. Одан кейін Ақмола облысы – 96,2 мың тонна, Алматы облысы – 64,7 мың тонна және Қостанай облысы – 43 мың тонна.

Ал 2025 жылдың қорытындысында Қазақстанда барлығы 671 мың тонна өңделген сүт өндірілген. Бұл 2024 жылмен салыстырғанда 6,2%-ға көп.

Экспорт көлемінде де өсім байқалады. 2026 жылдың қаңтар-шілде айларында Қазақстан шетелге 2,9 мың тонна өңделген сүт шығарды. Бір жыл бұрын бұл көрсеткіш 2,8 мың тонна болған. Осылайша, экспорт 3%-ға артты.

Қазақстандық өңделген сүттің негізгі бөлігі Ресейге экспортталған – 2,24 мың тонна. Өзбекстанға 307,9 тонна, ал Тәжікстанға 194 тонна өнім жеткізілген.