Қазақстанда азаматтарды телефон арқылы алдаған трансұлттық қылмыстық топтың қызметі тоқтатылды. Астана қаласының қылмыстық істер жөніндегі ауданаралық соты ұйымдасқан схемаға қатысқан 24 адамға қатысты үкім шығарды, деп Baspasoz.kz тілшісі Zakon.kz-ке сілтеме жасап хабарлайды.
Бұл туралы 19 қыркүйекте Қарағанды облысының прокуратурасы хабарлады. Сот барлық сотталушыны кінәлі деп танып, әрқайсысына 8 жыл бас бостандығынан айыру жазасын тағайындады.
Тергеу мәліметінше, топ мүшелері ұйымдастырушылардың нұсқауын орындап, өзара үйлесімді әрекет еткен. Олардың басым бөлігі Қазақстанға Ресейден келген. Кейбір қатысушылар қылмыстық схемада пайдаланылатын техниканы алу үшін Ресейге арнайы барған.
Қылмыстық топқа орындаушылар негізінен Telegram арқылы тартылған. Оларға белгілі бір қалаға барып, тұрғын үй жалдау, SIM-box құрылғыларын алу немесе жеткізу, жабдықты интернетке қосу және қазақстандық байланыс операторларының SIM-карталарын орнатып, құрылғының үздіксіз жұмысын қамтамасыз ету тапсырылған. Бұл қызметі үшін олар күніне 50-100 доллар көлемінде ақы алған.
Қылмыскерлер SIM-box арқылы Қазақстан азаматтарына қоңырау шалып, өздерін мемлекеттік органдардың, банктердің және «Қазпошта» АҚ қызметкерлері ретінде таныстырған. Кейін азаматтарды алдап, SMS арқылы келген кодтарды айтқызған, несие рәсімдеуге және жинаған қаражатын бөгде шоттарға аударуға көндірген.
Іс бойынша маңызды дәлелдердің бірі – сотталғандардың ұялы телефондарынан табылған Telegram хат-хабарлары. Онда SIM-карталарды ауыстыру, жабдықты баптау жөніндегі нұсқаулар және кураторларға берілген есептер болған.
Сотталушылар өз кінәсін мойындамағанымен, прокурорлар олардың қылмыстық әрекетке қатысын дәлелдеді.
Үкім әзірге заңды күшіне енген жоқ.
