Қазақстанда тұмауға қарсы вакцинация басталды

Қазақстанда маусымдық тұмауға қарсы вакцинация науқаны басталды. Тегін екпе жүргізу үшін 2,1 млн доза вакцина сатып алынған. Оның алғашқы 564 мың дозасы елге жеткізіліп, өңірлерге таратыла бастады, деп хабарлайды Baspasoz.kz.

Қазір вакцина Алматы, Түркістан және Жетісу облыстарына, сондай-ақ Алматы мен Шымкент қалаларына жеткізілді. Қалған өңірлер вакцинаны 5 қазанға дейін алады деп жоспарланып отыр. Препарат жеткізілген медициналық ұйымдарда екпе салу басталып кетті.

Биыл вакцинация үшін Ресейде өндірілген «Гриппол» вакцинасы қолданылады. Оның штамдық құрамы алдағы эпидемиялық маусымға арналған Дүниежүзілік денсаулық сақтау ұйымының ұсынымдарына сәйкес келеді.

Тегін екпе алдымен тұмау мен оның асқынуына бейім азаматтарға салынады. Олардың қатарында медицина қызметкерлері, диспансерлік есепте тұрған балалар, жетім және ата-анасының қамқорлығынсыз қалған балалар, медициналық-әлеуметтік мекемелердің қызметкерлері мен ондағы азаматтар, сондай-ақ инфекция жұқтыру қаупі жоғары адамдар бар.

Мамандар қазан айын тұмауға қарсы екпе алуға қолайлы кезең деп есептейді. Себебі вакцинадан кейін ағзада иммундық қорғаныс қалыптасуы үшін уақыт қажет. Екпе тұмау жұқтыру қаупін азайтып, аурудың ауыр өтуі мен асқыну ықтималдығын төмендетуге көмектеседі.

Нысаналы топқа кіретін азаматтар вакцинация туралы толық ақпаратты тіркелген емханасынан ала алады.