Қазақстанда валюталық депозит мөлшерлемесі өседі
Қазақстанда 2026 жылғы 1 қазаннан бастап ұзақ мерзімді валюталық жинақ салымдары бойынша шекті сыйақы мөлшерлемесі көтеріледі. Бұл туралы Қазақстанның депозиттерге кепілдік беру қоры (ҚДКБҚ) мәлімдеді, деп Baspasoz.kz тілшісі Kazinform.kz-ке сілтеме жасап хабарлайды.
Өзгеріс мерзімі 12 айдан асатын жинақ салымдарына ғана қатысты. Мұндай депозиттер бойынша шекті мөлшерлеме қазіргі 1%-дан жылдық 2,5%-ға дейін өседі.
Жаңа талап 1 қазаннан кейін ашылған немесе мерзімі ұзартылған салымдарға қолданылады.
ҚДКБҚ мәліметінше, белгіленген мөлшерлеме банктер үшін ұсынылатын ең жоғары шек саналады. Ал клиенттерге нақты қандай сыйақы ұсынатынын әр банк өзі белгілейді. Мерзімді және мерзімсіз валюталық салымдар, сондай-ақ 12 айға дейінгі жинақ депозиттері бойынша шекті мөлшерлеме өзгермейді және жылдық 1% деңгейінде қалады.
Қор дерегіне сәйкес, Қазақстандағы долларлану деңгейі айтарлықтай төмендеген. 2015 жылы бұл көрсеткіш 80% болса, 2026 жылғы 1 қыркүйекте 19,2%-ға дейін азайған. ҚДКБҚ теңгенің нығаюы мен қолайлы макроэкономикалық жағдай Ұлттық банкпен бірлесіп валюталық депозиттер бойынша мөлшерлемелерді реттеу талаптарын кезең-кезеңімен жеңілдетуге мүмкіндік бергенін атап өтті.
Сонымен қатар қор Қазақстандағы банктерде сақталған салымдарға берілетін кепілдік мөлшерін еске салды. Теңгедегі жинақ салымдары бойынша өтемақының ең жоғары мөлшері – 20 млн теңге. Теңгедегі өзге депозиттер, ағымдағы шоттар мен төлем карталары бойынша – 10 млн теңгеге дейін.
Ал доллар, еуро және басқа шетел валютасындағы депозиттер, шоттар мен карталар бойынша 5 млн теңгеге дейін кепілдік беріледі. Бұл сомаларға есептелген сыйақы да кіреді.
Бұған дейін Қазақстанда токенделген депозиттер енгізілуі мүмкін екені хабарланған. Оған қатысты нормаларды заңнамада қарастыру жоспарланып отыр.