Қазақстанның бес өңірінде орман өрті тіркелді

13 қыркүйекте Қазақстанның мемлекеттік орман қоры аумағында бес өрт оқиғасы тіркелді, деп Baspasoz.kz тілшісі Zakon.kz-ке сілтеме жасап хабарлайды.

Өрттің бір-бірден Алматы, Шығыс Қазақстан, Қызылорда және Павлодар облыстарында, сондай-ақ «Семей орманы» мемлекеттік орман табиғи резерватының аумағында шыққаны анықталды.

Тілсіз жауды мемлекеттік орман күзеті мамандары мен «Қазавиалесохрана» әуе патрулі байқаған. Өрт ошақтарына жедел түрде қажетті техника мен күштер жіберілді.

Өртті сөндіруге орман шаруашылығы қызметкерлері, Төтенше жағдайлар департаментінің мамандары, тікұшақтар және «Қазавиаорманқорғау» мекемесінің әуе-десанттық топтары жұмылдырылды.

Қазіргі уақытта өртті оқшаулау және толық сөндіру жұмыстары жалғасып жатыр.