«Қазгидромет» ауа райын болжауға жасанды интеллектіні қосты

«Қазгидромет» ауа райы болжамдарының дәлдігін арттыру үшін жасанды интеллект технологияларын қолданып жатыр. Бұл туралы Үкімет отырысында экология және табиғи ресурстар министрі Әлібек Қуантыров мәлімдеді, деп хабарлайды Baspasoz.kz.

Министрдің айтуынша, Қазақстан аумағының басым бөлігінде қазан және қараша айларында орташа ауа температурасы климаттық нормадан 1-2 градус жоғары болады деп болжануда.

Қазанда еліміздің көп бөлігінде жауын-шашын қалыпты деңгейде болады. Батыс және солтүстік-батыс өңірлерде жауын-шашын нормадан көп түсуі мүмкін. Ал оңтүстік, оңтүстік-шығыс, орталық облыстардың оңтүстік бөлігінде және Абай облысының жазық аумақтарында жауын-шашын мөлшері нормадан аз болады деп күтіледі.

Қарашада Қазақстанның басым бөлігінде жауын-шашын қалыпты мөлшерде түседі. Солтүстік Қазақстан облысында, сондай-ақ Павлодар, Ақмола және Қостанай облыстарының солтүстігінде жауын-шашын нормадан көп болуы ықтимал.

Биылдан бастап «Қазгидромет» болжам жасау барысында жасанды интеллект элементтері енгізілген WRF цифрлық моделін пайдаланып келеді. Жүйе ауа райын 2 және 6 шақырымдық кеңістіктік дәлдікпен модельдеп, 48 сағаттан 10 тәулікке дейінгі болжам жасауға мүмкіндік береді.

Министрдің сөзінше, жаңа технология ауа райы болжамдарымен қатар агрометеорологиялық және гидрологиялық болжамдардың, сондай-ақ дауылды ескертулердің дәлдігін арттыруға мүмкіндік береді. Бұл мемлекеттік органдарды, ұйымдар мен тұрғындарды ықтимал қолайсыз ауа райы туралы дер кезінде хабардар етуге көмектеседі.