Құтырмаға қарсы күрес: қауіпті дерттен сақтану жолдары

28 қыркүйекте әлемде Дүниежүзілік құтырмаға қарсы күрес күні аталып өтеді. Осыған орай медицина мамандары адам өміріне қауіп төндіретін жұқпалы аурудың алдын алу жолдарын еске салды, деп хабарлайды Baspasoz.kz.

Құтырма – адам мен жануарларға ортақ аса қауіпті инфекциялық ауру. Ол сүтқоректілердің барлық түрінде кездесуі мүмкін. Адамға вирус көбіне ауру жануар тістегенде, оның сілекейі жараға немесе шырышты қабыққа түскен кезде жұғады.

Инфекцияны жабайы және қаңғыбас жануарлармен қатар, үй жануарлары мен жарқанаттар да таратуы мүмкін.

Аурудың алғашқы белгілеріне дене қызуының көтерілуі, әлсіздік, мазасыздық, ұйқысыздық және тістелген жердің ауыруы немесе жайсыздық сезімі жатады. Кейін науқастың жарыққа, шуға және ауа қозғалысына сезімталдығы артып, құрысу, судан қорқу, сілекейдің көп бөлінуі, тыныс алудың қиындауы және салдану белгілері байқалуы мүмкін.

Құтырманың клиникалық белгілері пайда болған жағдайда ауру іс жүзінде әрдайым өліммен аяқталады. Сондықтан жануармен қауіпті байланыстан кейін медициналық көмекке мүмкіндігінше ертерек жүгіну маңызды.

Егер жануар тістеп алса немесе сілекейі теріге тисе, зақымдалған жерді дереу сабынмен мұқият жуып, сумен шаю қажет. Содан кейін медициналық ұйымға барған жөн. Дәрігер жағдайды бағалап, қажет болса құтырмаға қарсы вакцинация курсын және басқа да профилактикалық ем тағайындайды.

Мамандар ауру белгілерінің пайда болуын күтпеуге және басталған вакцинация курсын өз бетінше тоқтатпауға кеңес береді.

Құтырманың алдын алу үшін үй жануарларын уақтылы вакцинациялау, қаңғыбас және жабайы жануарлардан аулақ болу қажет. Мінез-құлқы күмәнді жануарды өз бетінше ұстауға немесе емдеуге болмайды. Құтырмаға күдік туған жағдайда ветеринариялық қызметке хабарлап, жануар тістеген немесе сілекейі тиген кез келген жағдайда дәрігерге жүгіну керек.

Дер кезінде көрсетілген медициналық көмек пен байланыстан кейінгі профилактика құтырманың дамуына жол бермеуге мүмкіндік береді.