Қыркүйек айының қорытындысында теңге бағамы 4,6 пайызға нығайып, бір доллар 440,49 теңгеге дейін төмендеді. Бұл туралы Ұлттық банк валюта нарығына қатысты ақпараттық хабарламасында мәлімдеді, деп Baspasoz.kz тілшісі Tengrinews.kz-ке сілтеме жасап хабарлайды.
Реттеушінің дерегінше, қыркүйекте валюта нарығына интервенция жасалған жоқ.
Бір ай ішінде Қазақстан қор биржасындағы валютаның орташа күндік сауда көлемі 415 млн доллардан 474 млн долларға дейін өсті. Жалпы сауда-саттық көлемі 10,4 млрд долларды құрады. Қыркүйекте Ұлттық қордан биржа нарығында 200 млн доллар сатылды. Бұл жалпы сауда көлемінің 1,9 пайызына тең. Күніне орта есеппен 9,1 млн доллар сатылған.
Ұлттық банк қыркүйекте Ұлттық қормен байланысты операцияларды 200–300 млн доллар көлемінде айна-қатесіз өтеу тетігін бастауды жоспарлаған. Алайда валюта нарығында ұсыныс жеткілікті болғандықтан, бұл операциялар кейінге қалдырылды. Оларды жүргізу мерзімі нарықтағы жағдайға қарай белгіленеді.
Ал алтын сатып алуға байланысты операциялар аясында қыркүйекте шамамен 374 млрд теңге айналымнан шығарылды. 2026 жылдың төртінші тоқсанында осы тетік арқылы шамамен 907 млрд теңгеге балама шетел валютасын сату жоспарланып отыр.
Бұл шараның мақсаты – Ұлттық банк отандық өндірушілерден алтын сатып алған кезде нарыққа түсетін теңге көлемін теңгеру. Артық ақша айналымнан шығарылып, соған сәйкес көлемде шетел валютасы сатылады. Осылайша валюта нарығындағы сұраныс пен ұсыныстың тепе-теңдігін сақтауға мүмкіндік туады.
Сонымен қатар Ұлттық банк Бірыңғай жинақтаушы зейнетақы қорының активтеріндегі валюталық үлесті сақтау үшін қыркүйекте биржадан 986 млн доллар сатып алды. Бұл жалпы сауда көлемінің шамамен 9,4 пайызына тең. Ұлттық банк алдағы уақытта теңге бағамына нарық қатысушыларының болжамы, тоқсандық салық төлемдері, әлемдік нарықтағы ахуал және геосаяси жағдай ықпал ететінін атап өтті.
Реттеуші теңгенің еркін қалыптасатын айырбас бағамы саясатын жалғастыратынын мәлімдеді. Бұл тәсіл нарықта теңгерімсіздіктің жиналуына жол бермеуге және елдің алтын-валюта резервтерін сақтауға бағытталған.
