Орталық Азия елдерінің сарапшылары мен бизнес өкілдері бес мемлекеттің үкіметіне цифрлық саясат және жасанды интеллект саласындағы ынтымақтастық туралы үкіметаралық келісім жобасын қарастыруды ұсынды. Бастама 28 қыркүйекте Астанада өткен «Орталық Азия елдерін цифрлық күн тәртібіне ықпалдастыру» атты өңірлік дөңгелек үстелде таныстырылды, деп Baspasoz.kz тілшісі Kazinform.kz-ке сілтеме жасап хабарлайды.
Құжатты Қазақстан, Өзбекстан, Қырғызстан, Тәжікстан және Түрікменстанның сарапшылары мен кәсіпкерлері әзірлеген. Бастаманың мақсаты – бес елге ортақ заңнама немесе бірыңғай реттеуші орган құру емес, мемлекеттердің цифрлық жүйелерін өзара үйлестіру.
Орталық Азия финтех қауымдастығының төрағасы Отабек Насировтың айтуынша, әр мемлекет өз заңнамасы мен құқықтық жүйесін сақтап қалады.
«Біз бес елге ортақ мемлекеттік орган немесе бірыңғай заңнама құруды ұсынып отырған жоқпыз. Бұл мүмкін емес әрі көп уақытты қажет етеді. Оның орнына заңнаманы айтарлықтай өзгертпей-ақ, бес мемлекеттің өзара келісіп жұмыс істеуіне мүмкіндік беретін тетік ұсынамыз», – деді ол.
Ұсыныстар қатарында электрондық қолтаңба мен құжаттарды өзара тану, елдер арасындағы төлемдерді жеңілдету, цифрлық сәйкестендіру мен электрондық құжат айналымын дамыту бар. Сондай-ақ жасанды интеллектіні реттеу тәсілдерін бір-біріне жақындату көзделген.
Насировтың сөзінше, келісім жобасы Астанада өтетін B5+1, C5+1 және Digital Bridge алаңдарында тиісті мемлекеттік органдардың қарауына ұсынылмақ. «Алдағы үш-төрт жылда мемлекеттік органдармен бірлесіп осы үкіметаралық келісімді жүзеге асыра алсақ, кәсіпкерлердің ғана емес, қарапайым азаматтардың да өмірін жеңілдетеміз», – деді ол.
Бастама авторлары алдағы уақытта Орталық Азияны халықаралық технологиялық компаниялар үшін өзара тығыз байланысқан, 80 миллионнан астам тұрғыны бар ірі өңірлік нарыққа айналдыруға мүмкіндік бар деп есептейді.
Бұған дейін Қазақстанның Моңғолиядағы елшісі Алмас Сейтақынов Моңғолияның цифрлық даму, инновациялар және коммуникациялар министрі Номин Чинбатпен кездескен еді. Тараптар цифрландыру, ақпараттық технологиялар және инновациялар саласындағы Қазақстан мен Моңғолия ынтымақтастығын дамыту мәселелерін талқылады.
