Президент Қ.Тоқаев жаңа тағайындалған қорғаныс министрі Айдос Мырзахметовті қабылдады, деп хабарлайды Baspasoz.kz.
Қабылдау барысында Президент қорғаныс министріне бірқатар тапсырмалар берген.
Елдің қорғаныс қабілетін нығайту, Қарулы Күштердің жауынгерлік дайындығын күшейту және әскери басқару жүйесін жетілдіру бойынша нақты тапсырмалар берді.
Мемлекет басшысы әскери қызмет қауіпсіздігіне баса назар аударды. Президент әскери қызметшілердің өмірі мен денсаулығын сақтау барлық деңгейдегі қолбасшылық үшін негізгі басымдық болуы керек екенін атап өтті.
Президент кәсіби даярлықтың сапасын арттыру, әскери инфрақұрылымды дамыту, қару-жарақ пен техниканы жаңғырту, заманауи технологиялар мен цифрлық шешімдерді енгізу жөнінде міндеттер жүктеді. Сондай-ақ Мемлекет басшысы сарбаздардың бойында жауапкершілік, тәртіп, Отанға адалдық қасиетін қалыптастыруға баса мән бере отырып, әскердегі тәрбие жұмысын күшейту қажеттігіне назар аударды.
Бұдан бөлек, әскери қызметшілер мен олардың отбасын әлеуметтік тұрғыдан қолдау мәселелеріне айрықша мән берілді.
Бүгін 27 қыркүйекте Дәурен Қосанов қорғаныс министрі лауазымынан босатылып, оның орнына Айдос Мырзахметов тағайындалды. Ал кеше қорғаныс министрлігін кешенді тексеру жөнінде комиссия құрылған еді.
