«Sarapshy» медиажобасына іріктеу басталды
Қазақстандық қоғамдық даму институты Мәдениет және ақпарат министрлігінің қолдауымен «Sarapshy» білім беру медиажобасына қатысушыларды іріктеу үшін ашық конкурс жариялады, деп хабарлайды Baspasoz.kz.
Жоба түрлі саладағы сарапшылардың ақпарат кеңістігіндегі белсенділігін арттырып, кәсіби пікірін көпшілікке түсінікті жеткізуіне көмектесуді көздейді. Қатысушылар БАҚ өкілдерімен жұмыс істеу, камера алдында сөйлеу, сұхбат беру, қоғамдық пікірталасқа қатысу және әлеуметтік желілерде сараптамалық контент ұсыну дағдыларын меңгереді.
Оқу барысында мәдениет, қоғамдық мінез-құлық пен әдепке қатысты өзекті мәселелер де талқыланады. Практикалық сабақтарды тәжірибелі журналистер мен медиатренерлер жүргізеді.
Конкурсқа мінез-құлық психологиясы, әлеуметтану, жалпы және цифрлық этика, антропология, этнология, мәдениеттану немесе урбанистика саласында білімі мен тәжірибесі бар мамандар қатыса алады.
Үміткердің жасы 40-тан аспауы, жоғары білімі және талдау орталықтарында, жоғары оқу орындарында, мемлекеттік қызметте, мемлекеттік органдарға қарасты ұйымдарда немесе азаматтық секторда кемінде бес жыл еңбек өтілі болуы қажет. Магистр, PhD немесе басқа ғылыми дәрежесі мен атағы бар мамандарға басымдық беріледі.
Іріктеу қорытындысы бойынша жобаға 25 адам қабылданады. Өтінімдер 2026 жылғы 2–11 қазан аралығында қабылданады.
Оқу 31 қазаннан 14 қарашаға дейін сенбі күндері сағат 09:30-дан 16:00-ге дейін өтеді. Қатысушылардың барлық практикалық сабаққа қатысуы міндетті.
Конкурсқа өтінім «Sarapshy» жобасының арнайы платформасы арқылы беріледі.
Қосымша ақпаратты Бану Сегізбаевадан 8 700 027 27 87 нөмірі немесе b.segizbayeva@kipd.kz электронды поштасы арқылы, сондай-ақ Салтанат Әлиден 8 (7172) 47 22 99 нөмірі немесе s.ali@kipd.kz поштасы арқылы алуға болады.