Нұрсұлтан Назарбаевтың 21 жастағы ұлы Тауманның үйлену тойы Астанада жабық форматта өтті. Тойға келген қонақтарға ұялы телефондарын арнайы қаптарға салып, құлыптап қою ұсынылған. Негізгі тойдан кейін қонақтар жабық кешке жиналған, деп Baspasoz.kz тілшісі Ulysmedia.kz-ке сілтеме жасап хабарлайды.
Нұрсұлтан Назарбаевтың 21 жастағы ұлы Тауманның үйлену тойы Астанада жабық форматта өтті. Тойға келген қонақтарға ұялы телефондарын арнайы қаптарға салып, құлыптап қою ұсынылған. Негізгі тойдан кейін қонақтар жабық кешке жиналған.
Той елордадағы The Ritz-Carlton, Astana қонақүйінде ұйымдастырылған. Мерекеге орай ғимараттың іші гүлдермен безендіріліп, ресепшн маңы мен баспалдақ ақ түсті гүлдермен көмкерілген.
Той өтетін аумаққа сырттан келген адамдар кіргізілмеген. Қонақүйдің лоббиінде отыруға келгендерге ғимаратта жабық шара өтіп жатқаны айтылған. Ал той қонақтарына ғимараттың бүйір жағынан бөлек кіреберіс қарастырылған.
Кеш барысында қазақстандық әнші Jah Khalib өнер көрсеткен. Алайда қонақтарға той кезінде фото және видео түсіруге рұқсат берілмеген. Ұйымдастырушылар қонақтардың смартфондарын арнайы құлыпталатын қаптарға салып, камераларды пайдалануға мүмкіндік бермеген.
Қонақтарға тойбастар ретінде шағын гүл шоқтары таратылған. Қонақүйге келгендердің бірінің айтуынша, гүлдердің арасында гортензия, пион тәрізді раушан және қызыл гүлдерден жасалған композициялар болған. Тойдан берілетін сарқыт та көзге түспейтін ақ пакеттерге салынған.
Негізгі той аяқталғаннан кейін мереке Lilou Bar мекемесінде жалғасқан. Сол күні бар қарапайым келушілер үшін жабылып, тек жеке шараға қызмет көрсеткен. Мекеме әкімшілігі бұл туралы әлеуметтік желідегі парақшасында алдын ала хабарлаған.
Тауман - Нұрсұлтан Назарбаев пен Асель Исабаеваның үлкен ұлы. Асель Исабаеваны кей деректерде Асель Құрманбаева деп те атайды. Назарбаев 2023 жылы жарық көрген «Менің өмірім. Тәуелділіктен еркіндікке» атты естелігінде Асельмен мұсылмандық салт бойынша некеге тұрғанын жазған. Олардың Тауман және Байкен есімді екі ұлы бар.
Тауманның қалыңдығы Айдана - бұрынғы Индустрия және инфрақұрылымдық даму вице-министрі, сондай-ақ «Қазақстан инжиниринг» ұлттық компаниясын басқарған Әділбек Сәрсембаев пен Әлия Иманбаеваның қызы. Айдана 2004 жылғы 24 желтоқсанда дүниеге келген.
Әділбек Сәрсембаев мемлекеттік қызметте ұзақ жыл еңбек еткен. Ол Астана әкімдігінде, Президент Әкімшілігінде қызмет атқарып, Петропавл қаласы әкімінің бірінші орынбасары болған. Кейін Солтүстік Қазақстан облысы әкімі аппаратының басшысы қызметін атқарып, «Қазақстан инжиниринг» компаниясында жұмыс істеген.
2021 жылы Сәрсембаев Индустрия және инфрақұрылымдық даму вице-министрі болып тағайындалып, бұл қызметті 2022 жылғы тамызға дейін атқарды.
