Мемлекет басшысы Қасым-Жомарт Тоқаев Қазақстан халқын Отбасы күнімен құттықтады, деп хабарлайды Baspasoz.kz.
Президент құттықтауында отбасы қоғам мен мемлекеттің дамуына ықпал ететін маңызды институт екенін атап өтті. Оның айтуынша, адамның дүниетанымы мен адамгершілік қасиеттері ең алдымен отбасында қалыптасады. Үлкендердің тәрбиесі мен ата-ананың өнегесі жас ұрпақтың өмірлік ұстанымдарын қалыптастыруда маңызды рөл атқарады.
Мемлекет басшысы Конституцияға сәйкес неке мен отбасы, ана, әке және бала мемлекеттің қорғауында екенін атап өтті. Сондай-ақ балалардың құқықтарын қорғауға және әйелдер мен аналардың отбасындағы рөлін күшейтуге басымдық берілгенін айтты. Биыл Отбасы мәселелері жөніндегі уәкіл институты да құрылған.
Қасым-Жомарт Тоқаев бала тәрбиесі мен өскелең ұрпақтың жан-жақты дамуына жағдай жасау мемлекеттің маңызды міндеттерінің бірі екенін жеткізді. Президент отансүйгіштік, заң мен тәртіпті сақтау, табиғатты қорғау және қоғамдық мәдениет сияқты құндылықтардың негізі отбасындағы тәрбиеден басталатынын айтты.
Мемлекет басшысы ортақ құндылықтарды дәріптеу арқылы қоғамда жаңа этиканы қалыптастыруға болатынын атап өтті. Сондай-ақ әр отбасы бақытты өмір сүретін Әділетті Қазақстан құру мақсатына сенім білдірді.
Президент құттықтау соңында барша қазақстандықтарға зор денсаулық пен мол табыс тіледі.
