Түркістан облысындағы білім бөліміне қатысты 1,3 млрд теңге дауына әкімдік жауап берді
Түркістан облысы Ордабасы аудандық білім бөлімінің бұрынғы басшысына қатысты әлеуметтік желіде тараған ақпаратқа облыс әкімдігі түсініктеме берді. Жарияланым авторы шенеунік бюджеттен 1,3 млрд теңгені туған әпкесіне тиесілі балабақшаға аударған деп мәлімдеген. Әкімдік бұл ақпарат шындыққа сәйкес келмейтінін айтты, деп Baspasoz.kz тілшісі Tengrinews.kz-ке сілтеме жасап хабарлайды.
Әлеуметтік желіде Ордабасы аудандық білім бөлімінде түсірілген видео тараған. Кадрларда әйел адам білім бөлімінің міндетін атқарушы басшысына бұрынғы басшының 2017-2024 жылдары қызмет атқарғанын айтып, балабақша иесімен туыстық байланысы бар-жоғын сұрайды.
Ол сондай-ақ мекеме бұл жағдайды білген-білмегенін және мәселе бойынша уәкілетті органдарға жүгіну жоспарланып отырғанын сұраған.
Білім бөлімінің міндетін атқарушы басшысы кәсіпкерлердің өзара туыстық байланыстарын мекеме арнайы тексермейтінін айтқан. Оның сөзінше, кәсіпкерлікпен айналысуға заң бойынша тыйым салынбаған.
Мәселені Түркістан облысы бойынша Мемлекеттік қызмет істері агенттігінің департаменті қарайтыны да айтылған.
Әкімдік 1,3 млрд теңге туралы не деді?
Түркістан облысының әкімдігі әлеуметтік желідегі жарияланымда көрсетілген 1,3 млрд теңге туралы ақпараттың шындыққа жанаспайтынын мәлімдеді. Әкімдіктің мәліметінше, балабақшаларға қаражат мемлекеттік білім беру тапсырысы және жан басына шаққандағы қаржыландыру тетігі арқылы бөлінеді. Қаржы тәрбиеленушілер саны мен бекітілген нормативтерге байланысты есептеледі.
Әкімдік бұл қаражатты бөлу бір ғана білім бөлімінің басшысының жеке шешімімен жүзеге аспайтынын атап өтті. Сонымен қатар жарияланымда көрсетілген сома да тиісті кезеңдегі нақты қаржыландыру көлеміне сәйкес келмейтіні айтылды. Алайда әкімдік балабақшаға нақты қанша қаражат бөлінгенін нақтыламады.
Бұрынғы басшы сотқа жүгінген
Әкімдік мәліметінше, білім бөлімінің бұрынғы басшысы әлеуметтік желіде тараған ақпаратқа байланысты сотқа жүгінген. Қазір ол Түркістан облысының Төлеби ауданында қызмет атқарады. Шенеунік тараған мәліметтерді шындыққа сәйкес келмейді әрі өзінің ар-намысына, қадір-қасиетіне және іскерлік беделіне нұқсан келтіреді деп есептейді.
Әкімдік бұл деректерге құқықтық бағаны сот беретінін хабарлады.
Сонымен қатар әкімдік балабақша иесінің бұрынғы білім бөлімінің басшысына туған әпке екені туралы ақпаратты растаған да, жоққа шығарған да жоқ.
Әкімдік бюджет қаражатына қатысты ақпарат тарату кезінде әлеуметтік желідегі тексерілмеген мәліметтерге емес, ресми құжаттар мен нақты деректерге сүйенуге шақырды.