Жерде соңғы үш айдағы ең күшті магниттік дауыл тіркелді
Жер бетінде соңғы үш айда болмаған күшті магниттік дауыл тіркелді. Мамандар оның әсері тағы бір тәулікке созылуы мүмкін екенін ескертті, деп Baspasoz.kz тілшісі Kazinform.kz-ке сілтеме жасап хабарлайды.
Ресей Ғылым академиясының Ғарыштық зерттеулер институты мен Ресей Ғылым академиясы Сібір бөлімшесінің Күн-жер физикасы институты ғалымдарының мәліметінше, магниттік дауыл 10 қазанда басталған. Оның қуаты G3 деңгейіне жеткен. Бұл бес деңгейлі өлшем бойынша күшті магниттік дауыл саналады.
Ғалымдардың айтуынша, мұндай қуатты магниттік дауыл соңғы рет 2026 жылғы 4 шілдеде байқалған. Сол кезде де Жердің магнит өрісіндегі ауытқулар G3 деңгейіне жеткен болатын.
Қазіргі құбылысқа аптаның басында Күнде болған күшті жарқылдан кейін ғарышқа тараған плазма бұлттары себеп болған.
Мамандардың болжамынша, Жердің магнит өрісіндегі өзгерістер алдағы бір тәулікте де сақталуы мүмкін.
Магниттік дауыл кезінде аспанда ерекше жарқыраған поляр шұғыласы байқалып жатыр. Бұл табиғи құбылысты солтүстік ендіктің 50 градусынан бастап кейбір аймақтардан да көруге мүмкіндік туған.