Жетісуда 1 келіге жуық мефедрон табылған әйелдің ісі қайта қаралады
Жетісу облысында көлігінен ірі көлемде мефедрон табылған әйелге қатысты сот үкімі жойылып, іс қайта қарауға жіберілді, деп хабарлайды Baspasoz.kz.
Іс материалдарына сәйкес, әйелдің автокөлігінен 962 грамм мефедрон тәркіленген. Психотроптық заттың тағы бір аз мөлшері оның жеке заттарының арасынан табылған.
Бұған дейін сот оны психотроптық затты өткізу мақсатынсыз заңсыз сақтағаны үшін кінәлі деп танып, 3 жылға бас бостандығынан айырған.
Алайда электрондық хат алмасу деректері мен психотроптық затты тасымалдауға қатысты мән-жайлар оның есірткіні өткізу мақсаты болған-болмағанын қосымша тексеруді қажет еткен.
Сонымен қатар тәркіленген мефедронның жалпы көлемі 1 келіге жуықтап, аса ірі мөлшер санатына жатқызылған. Бұл жағдай да затты иемдену және тасымалдау мақсатын анықтау кезінде ескерілуі тиіс.
Прокурордың наразылығынан кейін кассациялық сот бұған дейін шығарылған үкімнің күшін жойып, қылмыстық істі жаңа сот талқылауына жіберді.