Жетісуда 20 жылдық өтілі бар шенеунік құмар ойынға қатысқаны үшін жұмыстан босатылды
Жетісу облысының Көксу ауданында екі мемлекеттік қызметші құмар ойындарға тұрақты түрде қатысқаны үшін қызметінен босатылды, деп Baspasoz.kz тілшісі Tengrinews.kz-ке сілтеме жасап хабарлайды.
Аудан прокуратурасы мемлекеттік қызметшілер арасында лудоманияның алдын алу және әдеп талаптарының сақталуына қатысты талдау жүргізген. Нәтижесінде кейбір қызметкерлердің смартфон арқылы букмекерлік кеңселерде жүйелі түрде бәс тіккені анықталды. Тексеру барысында олардың ойын шоттарына жалпы сомасы 7,7 миллион теңгеден астам қаражат салғаны белгілі болған.
Тәртіптік комиссияның шешімімен екі лауазымды тұлға атқарып отырған қызметтерінен босатылды. Олардың бірі аудандық бөлімшені басқарған және мемлекеттік қызметтегі еңбек өтілі 20 жылдан асқан.
Айта кетейік, Қазақстанда мемлекеттік қызметшілерге құмар ойындарға қатысуға заңмен тыйым салынған. Бұл норма 2024 жылдың қыркүйегінде күшіне енді. Талапты бұзған мемлекеттік қызметшілер қызметінен босатылуы мүмкін.