25 қыркүйекте Қазақстанның кей өңірінде үскірік жүреді

25 қыркүйекте Қазақстанның бірқатар өңірінде ауа райы құбылып, жаңбыр, найзағай, тұман және қатты жел күтіледі. Шығыс Қазақстан облысының кей жерінде үсік жүруі мүмкін, деп Baspasoz.kz тілшісі Zakon.kz-ке сілтеме жасап хабарлайды.

«Қазгидромет» мәліметінше, түнде Шығыс Қазақстан облысының солтүстігі мен шығысында ауа температурасы -1 градусқа дейін төмендейді.

Еліміздің басым бөлігі антициклон ықпалында болғандықтан, жауын-шашынсыз ауа райы сақталады. Ал батыс, солтүстік-батыс және солтүстік өңірлерде солтүстік циклон мен атмосфералық фронттардың әсерінен жаңбыр жауып, найзағай ойнауы ықтимал.

Қазақстанның көптеген өңірінде жел күшейеді. Оңтүстікте шаңды дауыл болжанса, оңтүстік және шығыс аймақтарда түнде және таңертең тұман түсуі мүмкін.

Сонымен қатар бірқатар облыста өрт қаупі сақталады. Батыс Қазақстан облысының солтүстігінде, Павлодар облысының шығысында, Атырау облысының солтүстік-шығысында, Маңғыстау облысында және Ақтөбе облысының оңтүстік-шығысында өрт қаупі жоғары.

Түркістан мен Қызылорда облыстарында, сондай-ақ Атырау, Жамбыл, Батыс Қазақстан, Ақтөбе, Алматы және Қарағанды облыстарының жекелеген аумақтарында төтенше өрт қаупі болжанып отыр. Мұндай қауіп Қостанай және Ұлытау облыстарында да сақталады.
Бұған дейін синоптиктер Қазақстанның үш ірі қаласында 25–27 қыркүйек күндері ауа райы қандай болатынын хабарлаған еді.