Қазақстандық велошабандоз Алексей Луценко Жапонияның Айти–Нагоя қаласында өтіп жатқан XX жазғы Азия ойындарында алтын медаль иеленді, деп хабарлайды Baspasoz.kz.
Спортшы ерлер арасындағы тасжол велоспортының жекелей уақытқа жарысында 41 минут 24,05 секунд нәтижесімен бірінші орын алды. Екінші орын жапониялық Шунсукэ Имамураға бұйырса, қола жүлдені моңғолиялық Сайнбаяр Джамбальямц жеңіп алды.
Осылайша Луценко Қазақстан құрамасына Азия ойындарындағы екінші алтын медальді сыйлады. Бұл – спортшының құрлық додасындағы бесінші алтыны. Ол бұған дейін 2014, 2018 және 2023 жылдардағы Азия ойындарында чемпион атанған.
Жекелей уақытқа жарыстағы Луценконың бұған дейінгі көрсеткіштері:
2014 жыл, Оңтүстік Корея – 42 км: 50:28.78;
2018 жыл, Индонезия – 40 км: 55:37.13;
2023 жыл, Қытай – 39,7 км: 48:05.75.
Алексей Луценко – 2017 жылғы Азия чемпионы және 2012 жылғы 23 жасқа дейінгі спортшылар арасындағы әлем чемпионы.
Айта кетейік, Қазақстан құрамасы 1994 жылдан бері жазғы Азия ойындарына қатысып келеді. Бұған дейін бес дүркін чемпион атанған жалғыз қазақстандық спортшы каноэші Константин Негодяев еді.
Қазақстанда тасжол велоспорты 9 өңірде дамып келеді. Бұл спорт түрімен 5,3 мыңнан астам адам тұрақты айналысады. Елде спортшыларды 111 жаттықтырушы даярлайды. Балалар-жасөспірімдер спорт мектептерінде тасжол велоспорты бойынша 22 бөлімше жұмыс істейді.
Ұлттық құраманың сапында шамамен 120 спортшы бар. Оның 27-сі штаттық ұлттық команда құрамына кіреді.
XX жазғы Азия ойындары Айти–Нагояда 19 қыркүйек пен 4 қазан аралығында өтеді.
