eGov Mobile арқылы отбасының әл-ауқатын бағалауға болады
Қазақстанда eGov Mobile мобильді қосымшасына отбасының әлеуметтік жағдайын бағалауға мүмкіндік беретін жаңа калькулятор енгізілді. Сервис азаматтарға мемлекеттік қолдау көрсету кезінде ескерілетін талаптармен алдын ала танысуға көмектеседі, деп хабарлайды Baspasoz.kz.
Жаңа қызмет 2027 жылғы 1 қаңтардан бастап кейбір мемлекеттік әлеуметтік көмектерді отбасының нақты тұрмыс жағдайы мен мұқтаждық деңгейіне қарай тағайындау жүйесіне көшу аясында іске қосылды.
Калькулятордың көмегімен қазақстандықтар отбасының әл-ауқат деңгейін өз бетінше бағалап, әлеуметтік қолдау көрсету кезінде қандай жағдайлар ескерілетінін біле алады. Бағалау барысында отбасының табысы мен меншігіндегі мүлік қана емес, оның құрамы да назарға алынады. Атап айтқанда, балалардың, қарт адамдардың және мүгедектігі бар отбасы мүшелерінің болуы есепке алынады.
Жалпы, отбасының әлеуметтік жағдайы алты бағыт бойынша 59-дан астам көрсеткіш негізінде бағаланады. Бұл азаматтардың тұрмыс деңгейін жан-жақты анықтауға мүмкіндік береді.
Алайда калькулятор көрсеткен нәтиже мемлекеттік жәрдемақы тағайындауға немесе қолданыстағы төлемді тоқтатуға негіз болмайды. Себебі есептеу азаматтың өзі енгізген мәліметтерге сүйеніп жүргізіледі және тек ақпараттық сипатқа ие.
Осылайша, жаңа сервис қазақстандықтарға отбасының әлеуметтік жағдайын алдын ала бағалап, мемлекеттік қолдау жүйесіндегі өзгерістер туралы түсінік алуға мүмкіндік береді.