Қазақстанда 69 жасөспірім есірткі қылмысына қатысты ұсталды
Қазақстанда жаңа оқу жылы басталғалы есірткі қылмыстарына қатысы бар 69 кәмелетке толмаған бала ұсталды. Бұл туралы Ішкі істер министрлігі мәлімдеді, деп Baspasoz.kz тілшісі Zakon.kz-ке сілтеме жасап хабарлайды.
Ведомствоның дерегінше, полиция қызметкерлері оқу орындарында 16 мыңға жуық профилактикалық іс-шара өткізген. Оның 5 мыңнан астамына мұғалімдер, психологтар мен дәрігер-наркологтар қатысты.
Ұсталғандардың 40-ы есірткі заттарын өткізді деген күдікке ілінсе, 27 жасөспірімнен аса ірі көлемдегі есірткі табылған. Тағы екі бала есірткіні жарнамалау және насихаттауға байланысты ұсталған. Олардың 52-сі ұл, 17-сі қыз.
Қылмысқа қарсы іс-қимыл комитетінің есірткі қылмысына қарсы басқарма бастығы Бақытжан Әмірханов ата-аналарды балаларының мінез-құлқы мен араласатын ортасына мұқият болуға шақырды.
Мамандар жасөспірімнің есірткі айналымына қатысы болуы мүмкін екенін көрсететін белгілерге аяқ астынан көп ақша немесе қымбат заттардың пайда болуын, телефон мен хат-хабарларын жасыруын, күмәнді скриншоттарды, сондай-ақ орама, шағын пакет, изолента және электронды таразы сияқты заттардың болуын жатқызады.
Министрлік Қазақстанда есірткі қылмыстары үшін қылмыстық жауапкершілік 16 жастан басталатынын еске салды.
Бұған дейін Алматыда «Буран-613» патрульдік экипажы жарты миллиард теңгеге бағаланған ірі көлемдегі есірткі партиясын алып жүрген ер адамды ұстаған еді. Күдікті полицейлерден қашып, жол бойында киімдері мен заттарын тастап кеткен.