Шай мен кофені тым ыстық күйінде ішу денсаулыққа зиян келтіруі мүмкін. Оксфорд университетінің ғалымдары жоғары температурадағы сусындарды жиі тұтыну өңеш обырының даму қаупімен байланысты екенін анықтады, деп хабарлайды Baspasoz.kz.
Зерттеушілер миллионға жуық адамның денсаулығы мен күнделікті сусын ішу әдеттеріне қатысты деректерді талдаған. Олар шай мен кофенің мөлшеріне ғана емес, қандай температурада ішілетініне де назар аударған.
Зерттеу нәтижесінде өте ыстық сусындарды ұнататын адамдарда өңештің жалпақ жасушалы обырына шалдығу қаупі жылы сусын ішетіндерге қарағанда үш еседен астам жоғары екені байқалған. Сондай-ақ күніне алты немесе одан көп кесе ыстық сусын тұтыну қатерлі ісіктің осы түрінің даму қаупінің 71 пайызға жоғары болуымен байланысты екені анықталған.
Ғалымдар шай мен кофенің әсерінен айтарлықтай айырмашылық таппаған. Олардың пікірінше, мәселе сусынның құрамында емес, температурасында болуы мүмкін. Өйткені тым ыстық сұйықтық өңештің ішкі шырышты қабатын зақымдап, оның қалыпты жұмысына кері әсер етуі ықтимал. Дегенмен зерттеу ыстық сусындардың қатерлі ісікке тікелей себеп болатынын толық дәлелдемейді. Ол тек сусын температурасы мен ауру қаупінің арасындағы байланысты көрсетеді.
Шай мен кофені қалай ішкен дұрыс?
Мамандар сүйікті сусындардан біржола бас тартудың қажеті жоқ екенін айтады. Тек шай немесе кофені қайнаған күйінде ішпей, біраз салқындағанын күткен жөн.
Дүниежүзілік денсаулық сақтау ұйымының Халықаралық қатерлі ісіктерді зерттеу агенттігі 65°C-тан жоғары температурадағы сусындарды тұтынуды адам үшін қатерлі ісік тудыруы ықтимал факторлардың қатарына жатқызған. Сондықтан күнделікті шай мен кофені ауыз күйдірмейтіндей температурада ішу – өңеш саулығын сақтауға көмектесетін қарапайым сақтық шараларының бірі.
