Астанада Жұбанов пен Хамидидің 120 жылдығына арналған концерт өтті
Астанада қазақ кәсіби музыкасының дамуына өлшеусіз үлес қосқан композиторлар Ахмет Жұбанов пен Латиф Хамидидің туғанына 120 жыл толуына орай "Тұңғыш саундтрек" атты концерт ұйымдастырылды, деп хабарлайды Baspasoz.kz.
Музыкалық кеш Роза Бағланова атындағы "Қазақконцерт" мемлекеттік академиялық концерттік ұйымында өтті. Көрермендерге қазақ музыкасының алтын қорына енген шығармалар симфониялық оркестрдің сүйемелдеуімен ұсынылды.
Сахнада Қазақстанның еңбек сіңірген қайраткерлері Бибігүл Жанұзақ, Азамат Жылтыркөзов, Салтанат Ахметова, сондай-ақ опера әншілері Айзада Капонова, Нұрсезім Саматқызы, Саят Сақитжан, Лаура Ғалым және Бекұлан Ерболатұлы өнер көрсетті.
Қазақ мемлекеттік симфониялық оркестріне ұжымның көркемдік жетекшісі Мирас Нұржанов дирижерлік етті.
Концерт бағдарламасына "Қазақ вальсі", "Бұлбұл", "Ләйлім", "Елік-ай" секілді көпшілікке жақсы таныс туындылар енді. Сонымен бірге көрермендер "Абай" операсынан үзінділер мен қазақтың тұңғыш көркем фильмі "Амангелдіге" жазылған музыканы тыңдады. Кештің "Тұңғыш саундтрек" деп аталуы да осы тарихи туындымен байланысты. Қазақ киносының алғашқы көркем фильмдерінің бірі саналатын "Амангелдіге" жазылған музыка ұлттық кино өнерінің қалыптасу кезеңін еске салады.
Концерт барысында Ахмет Жұбанов пен Латиф Хамидидің қазақ музыкасына қосқан үлесі мен шығармашылық мұрасына ерекше назар аударылды. Екі композитордың еңбегі ұлттық музыканың кәсіби деңгейде дамуына, опера және оркестр өнерінің өркендеуіне жол ашты.
"Тұңғыш саундтрек" концерті көрермендерді қазақ музыкасының тарихымен қайта қауыштырып, өткен ғасырда жазылған туындылардың бүгін де өз құндылығын жоғалтпағанын көрсетті.
Ұйымдастырушылардың айтуынша, мұндай мәдени шаралардың басты мақсаты – ұлт руханиятына еңбек сіңірген тұлғалардың мұрасын дәріптеп, қазақ музыкасының бай қазынасын кейінгі ұрпаққа жеткізу.