Әкелердің бала күтімі демалысы аналардікінен 8 есе қысқа
Әлем елдерінде бала күтіміне байланысты әкелерге берілетін ақылы демалыс мерзімі аналардікінен орта есеппен сегіз есе қысқа. Бұл туралы БҰҰ Әйелдер құрылымы мен Дүниежүзілік банк тобының бірлескен зерттеуінде айтылған, деп Baspasoz.kz тілшісі Kazinform.kz-ке сілтеме жасап хабарлайды.
Зерттеу аясында әлемнің 190 ел мен аумағындағы еңбек заңнамасы сараланған. Нәтижесінде олардың 66-сында әкелерге бала күтіміне байланысты ақылы демалыс беру заңмен кепілдендірілмегені анықталды. Ал аналарға қатысты мұндай жағдай небәрі алты ел мен аумақта кездеседі.
Әкелерге ақылы демалыс қарастырылған 124 ел мен аумақтың жартысында оның ұзақтығы екі аптаға да жетпейді. Сонымен қатар әлем елдерінің үштен біріне жуығы Халықаралық еңбек ұйымының аналарға кемінде 14 апта ақылы демалыс беру жөніндегі талабын орындамай отыр.
Әкелерге қолдау жеткіліксіз
Зерттеу ер азаматтардың бала тәрбиесіне белсенді араласуға ниетті екенін, алайда көп жағдайда қажетті қолдау таппайтынын көрсетті. Сауалнамаға қатысқан әкелердің 87 пайызы бала күтіміне қатысты көмектің жеткіліксіз екенін айтқан. Ал 83 пайызы жұмыс берушілердің отбасылық міндеттерін атқаруға ыңғайлы жұмыс кестесін ұсынбайтынын жеткізген.
Сарапшылардың мәліметінше, әйелдер бала тәрбиесіне, науқас немесе күтімді қажет ететін отбасы мүшелеріне қарауға ер адамдарға қарағанда орта есеппен 2,5 есе көп уақыт жұмсайды. Бұл – еңбекақы төленбейтін үйдегі жұмыс.
Мамандар әкелердің бала тәрбиесіне белсенді араласуы бүлдіршіндердің дамуына оң ықпал ететінін айтады. Сондай-ақ бұл аналардың жұмысқа орналасуына, кәсіби тұрғыдан өсуіне және табысын арттыруына мүмкіндік береді.
Осыған байланысты БҰҰ Әйелдер құрылымы мен Дүниежүзілік банк тобы 29 қазанда атап өтілетін Халықаралық қамқорлық және қолдау күні қарсаңында мемлекеттерді отбасындағы бала күтімі мен үй шаруасына қатысты міндеттерді ата-аналар арасында әділ бөлуге жағдай жасауға шақырды.