АҚШ-та блогерлерге қандай талаптар қойылады?
АҚШ-та блогерлердің қызметін реттейтін бірыңғай федералдық заң жоқ. Олардың жұмысы жарнама, авторлық құқық, салық туралы заңдармен және әлеуметтік желілердің ішкі ережелерімен реттеледі, деп Baspasoz.kz тілшісі Kazinform.kz-ке сілтеме жасап хабарлайды.
АҚШ-та блогерлерге қойылатын талаптар олардың қандай контент жариялайтынына, жарнамадан қанша табыс табатынына және қай штатта жұмыс істейтініне байланысты өзгереді.
Жарнаманы жасырғандарға қандай талап қойылады?
АҚШ-тың Федералдық сауда комиссиясының (FTC) ережесіне сәйкес, блогер белгілі бір компаниядан ақша, тегін тауар немесе басқа да сыйақы алып, оның өнімін жарнамаласа, бұл туралы оқырмандарына ашық айтуға міндетті. Жарнамалық белгі көзге бірден түсуі керек. Оны ұзақ мәтіннің соңына немесе хэштегтердің арасына жасыруға болмайды. Бұл талап Instagram, TikTok, YouTube және басқа да платформаларға қатысты.
Сондай-ақ блогер өзі қолданбаған тауарды пайдаланғандай көрсетіп, оның тиімділігі туралы дәлелсіз мәлімдеме жасамауы тиіс. Толығырақ: АҚШ Федералдық сауда комиссиясының талаптары.
Тегін сыйлықтар үшін де салық төленуі мүмкін
АҚШ-та блогерлер тек ақшалай табысына ғана емес, жарнамалық келісім аясында алған тауарлары мен қызметтеріне де салық төлеуі мүмкін. Мәселен, компания блогерге жарнама жасағаны үшін қымбат телефон сыйласа, оның құны табыс ретінде есептелуі ықтимал.
АҚШ Салық қызметінің (IRS) түсіндіруінше, кәсіптік қызметтен түскен кіріске ақшадан бөлек, төлем ретінде алынған мүлік пен қызметтер де жатады.
Өзгенің суреті мен видеосын рұқсатсыз пайдалануға болмайды
АҚШ заңнамасы интернетте жарияланған фотосуреттерді, бейнежазбаларды, музыканы және басқа да шығармаларды авторлық құқықпен қорғайды. Блогер өзгенің материалын пайдаланғысы келсе, әдетте автордың рұқсатын алуы немесе тиісті лицензия талаптарын сақтауы қажет. Автордың аты-жөнін көрсету немесе дереккөзге сілтеме беру материалды еркін пайдалануға автоматты түрде құқық бермейді.
Дегенмен АҚШ-та fair use деп аталатын қағида бар. Ол белгілі бір жағдайларда авторлық құқықпен қорғалған материалдарды рұқсатсыз пайдалануға мүмкіндік береді. Мұндай жағдайлар жеке бағаланады.
Блогерлер қанша салық төлейді?
АҚШ-та әлеуметтік желіден табыс табатын азаматтар салық төлеуге міндетті. Оған жарнама, демеушілік келісімдер, платформалардан түсетін төлемдер және тапсырыспен жасалған контенттен алынған кіріс кіреді. Салық мөлшері блогердің табысына, жұмыс істеу тәртібіне және тұратын штатына байланысты.
Мысалы, Флоридада жеке тұлғалардың табысына штат деңгейінде салық салынбайды. Алайда блогерлер федералдық салықтардан босатылмайды.
Ал Калифорнияда кәсіпкерлік қызметке қосымша талаптар қарастырылған. Мәселен, штатта тіркелген жауапкершілігі шектеулі компаниялар (LLC) үшін жыл сайын 800 доллар салық белгіленген. Белгілі бір табыс деңгейінен асқан жағдайда қосымша төлемдер де алынуы мүмкін.
Осылайша АҚШ-та блогерлер қызметінің негізгі талаптары – жарнаманы ашық көрсету, жалған ақпаратпен тауар сатпау, авторлық құқықты сақтау және табысын заңға сәйкес көрсету. Бұл ережелер әлеуметтік желі арқылы табыс табатын азаматтардың барлығына қатысты.