АҚШ-та ұшақ кешіксе, жолаушылар тамақ пен қонақүйсіз қалуы мүмкін

19 қазаннан бастап АҚШ-та әуе рейсі кешіккен немесе тоқтатылған жағдайда жолаушыларға көрсетілетін көмек тәртібі өзгереді. Жаңа ережеге сәйкес, әуе компаниялары кейбір жағдайларда жолаушыларды тамақпен, қонақүймен қамтамасыз ету міндетінен босатылуы мүмкін, деп Baspasoz.kz тілшісі Tengrinews.kz-ке сілтеме жасап хабарлайды.

АҚШ Көлік министрлігі әуе тасымалдаушыларының жауапкершілігіне қатысты талаптарды қайта қарап жатыр. Жаңа өзгерістерге сәйкес, рейстің кешігуіне немесе тоқтатылуына себеп болған 10 түрлі жағдай әуе компаниясының бақылауынан тыс оқиғалар қатарына енгізіледі.

Бұл өзгеріс жолаушылардың қосымша қызметтер мен өтемақы алу мүмкіндігіне әсер етуі ықтимал.

Қазір қандай тәртіп қолданылады?

АҚШ-та қолданыстағы ережелер бойынша, егер рейс әуе компаниясына байланысты себептермен кешіксе, жолаушыларға белгілі бір көмек көрсетіледі. Мәселен, тасымалдаушылар жолаушыларға тамақтануға арналған ваучер, қонақүйден орын және басқа да қызметтер ұсына алады. Ал заңда белгіленген жағдайларда билет құны толық қайтарылады.

Алайда 19 қазаннан бастап кейбір оқиғалар әуе компаниясының жауапкершілігіне жатпайтын болады.

Қандай жағдайда өтемақы алу қиындайды?

Жаңа ережеге сәйкес, төмендегі 10 жағдай әуе тасымалдаушысының бақылауынан тыс оқиғалар ретінде қарастырылады:

- Жолаушының қайтыс болуы. Ұшақ бортында адам көз жұмып, салонды тазалау және залалсыздандыру қажеттілігі туындаса.

- Ұшақтың сыртқы зақымдануы. Қолайсыз ауа райы, бөгде заттар немесе қасақана әрекеттер салдарынан әуе кемесіне зақым келсе.

- Жүк тасымалдау жүйесіндегі ақаулар. Әуе компаниясына қатысы жоқ ұйымдардың жүйелері істен шығып, багаж немесе жүк тиеу жұмыстары кешіксе.

-  Кибершабуылдар. Тасымалдаушы киберқауіпсіздік талаптарын орындағанына қарамастан, ақпараттық жүйелерге шабуыл жасалса.

- Мемлекеттік жүйелердің істен шығуы. Ұшу қауіпсіздігіне әсер ететін мемлекеттік техникалық жүйелерде күтпеген ақау пайда болса.

- Шұғыл қауіпсіздік шаралары. Міндетті төтенше әрекеттер салдарынан ұшақ тежегіштері қызып кетсе.

- Жоспардан тыс техникалық жөндеу. Ұшу қауіпсіздігі үшін кейінге қалдыруға болмайтын жөндеу жұмыстары қажет болса.

- Медициналық төтенше жағдайлар. Жолаушының немесе экипаж мүшесінің денсаулығына байланысты шұғыл көмек көрсету қажеттілігі туындаса.

- Жолаушының тәртіп бұзуы. Қауіпсіздік ережесін сақтамаған адамды ұшақтан түсіруге тура келсе.

- Ауа райына байланысты әуежайдың жабылуы. Қатты жел, жанартау күлі немесе басқа да қауіпті табиғи құбылыстар салдарынан әуе қозғалысы шектелсе.

Бұл жағдайларда жолаушыларға қосымша қызмет көрсету әуе компаниясының міндеті ретінде қарастырылмауы мүмкін.

Жолаушылар мүлде көмексіз қала ма?

Жаңа талаптар әуе компанияларына жолаушыларға көмек көрсетуге тыйым салмайды.

Fox News мәліметінше, тасымалдаушылар рейс кешіккен жағдайда бұрынғыдай қонақүй, тамақтану ваучерлері және өзге де қызметтер ұсына алады. Алайда мұндай көмектің көрсетілуі нақты жағдайға және компанияның ішкі саясатына байланысты болады. Сондықтан мамандар билет сатып алмас бұрын тасымалдаушының рейс кешіккен немесе тоқтатылған кездегі міндеттемелерімен танысуға кеңес береді.

Сондай-ақ әуе билеті төленген банк картасының шарттарын тексерген жөн. Кейбір карталарда сапарды сақтандыру қызметі қарастырылған. Ол рейс кешіккен немесе тоқтатылған жағдайда туындаған қосымша шығындарды өтеуі мүмкін.

Қазақстанда жолаушылардың қандай құқықтары бар?

Қазақстанда рейс кешіккен жағдайда жолаушыларға көмек көрсету тәртібі заңмен реттеледі.

"Қазақстан Республикасының әуе кеңістігін пайдалану және авиация қызметі туралы" заңның 86-бабына сәйкес, тасымалдаушы рейстің кешігу себебіне қарай жолаушыларға қажетті қызметтер көрсетуге міндетті.

Атап айтқанда, жолаушыларға салқын сусындар мен ыстық тамақ ұсынылуы тиіс. Ал рейс ұзақ уақытқа кешіксе, қонақүйден орын беріліп, оған жеткізу және кері алып келу ұйымдастырылады.

Сонымен қатар Қазақстан заңнамасында әуе компаниясының кінәсінен рейс кешіккен жағдайда белгілі бір талаптар бойынша ақшалай өтемақы төлеу де қарастырылған.