Apple-дің сирек компьютері 1,15 миллион долларға сатылды

АҚШ-та Apple компаниясының алғашқы компьютерлерінің бірі аукционда 1,15 миллион долларға сатылды. Бұл сериялық түрде шығарылған Apple-1 компьютерлері үшін төленген ең жоғары баға болды, деп Baspasoz.kz тілшісі BILD-ке сілтеме жасап хабарлайды.

Сауда 14 қазанда Нью-Йорктегі Bonhams аукцион үйінде өтті. Бәссауданың соңында екі сатып алушы құрылғы үшін таласып, оның құнын 1,15 миллион долларға дейін көтерген.

1976 жылы жасалған тарихи компьютер

Hatfield деп аталатын Apple-1 компьютері 1976 жылы, Apple компаниясы құрылған жылы шығарылған. Арада жарты ғасыр өтсе де, құрылғы әлі күнге дейін жұмыс істейді. Оның электрондық тақтасында компанияның негізін қалаушылардың бірі Стив Возняктың қолтаңбасы сақталған.

Сатып алушыға компьютермен бірге Стив Джобстың 1978 жылғы қаңтарда жазған хаты да берілді.

Хатта Джобс құрылғының алғашқы иесі Фред Хэтфилдке ескі компьютерін жады көлемі 4 килобайт болатын жаңа Apple II моделінің тақтасына айырбастауды ұсынған. Алайда Хэтфилд бұл ұсыныстан бас тартып, алғашқы компьютерін сақтап қалған.

Әлемде санаулы данасы ғана қалған

Apple-1 – компанияның нарыққа шығарған тұңғыш өнімі. Ол қазіргі компьютерлер сияқты дайын күйінде сатылмаған. Сатып алушыларға құрастырылған электрондық тақта ұсынылып, оған пернетақта мен мониторды өздері жалғауы қажет болған.

Apple-1 компьютерлерінің тізіліміне сәйкес, бүгінде осы модельдің 94 данасы сақталғаны расталған. Ал Bonhams аукцион үйінің бағалауынша, олардың саны 75-тен аз болуы мүмкін. Оның үстіне жұмыс істейтіндері тіпті сирек кездеседі.

Сауда басталғанға дейін Hatfield компьютерінің құны 500–800 мың доллар шамасында бағаланған. Алайда сатып алушылар арасындағы бәсеке нәтижесінде оның бағасы болжанған ең жоғары сомадан да асып түсті.

Осылайша, кезінде жаңасына айырбасталмай сақталып қалған компьютер арада 50 жыл өткенде миллион доллардан астам қаржыға сатылған тарихи жәдігерге айналды.