Баку «Формула-1» Гран-приін өткізуге дайын
Әзербайжан астанасы Баку «Формула-1» Гран-приін өткізуге дайындалып жатыр. Жарыс қарсаңында Баку автодромы көлік пен жаяу жүргіншілер қозғалысына жабылып, негізгі дайындық жұмыстары аяқталды., деп Baspasoz.kz тілшісі Kazinform.kz-ке сілтеме жасап хабарлайды.
Бірнеше күннен кейін жүйрік болидтер жарысатын қала көшелерінің келбеті қазір мүлде өзгерген. Күнделікті көлік қатынайтын жолдардың бір бөлігі арнайы жарыс жолына айналды. Оның бойына қорғаныш тосқауылдары орнатылып, көрермендерге арналған мінберлер әзірленді. Қауіпсіздік шаралары күшейтіліп, жол жабынын дайындау жұмыстары аяқталды.
Баку жарысының басты ерекшелігінің бірі – автодромның қаланың тарихи және сәулеттік көрікті жерлерін бойлай өтуі. Болидтер Азадлыг және Азнефть алаңдарының, Қыз мұнарасының және Ичеришехер қамалы қақпаларының жанынан өтеді.
Каспий жағалауынан Ичеришехерге дейін
Гран-при Азадлыг алаңынан басталады. Бұдан кейін жарысушылар Каспий теңізінің жағалауындағы бөлікке шығып, қаланың тарихи орталығына қарай бет алады. Ичеришехер аумағында оларды тар көшелер мен күрделі бұрылыстар күтіп тұр. Баку автодромы ұзын әрі жоғары жылдамдықпен жүруге мүмкіндік беретін түзу жолдары және тарихи орталықтағы күрделі бұрылыстарымен ерекшеленеді. Заманауи жарыс көліктерінің ғасырлар бойы сақталған сәулет ескерткіштерінің жанынан жүйткуі Әзербайжан Гран-приінің өзіндік ерекшелігіне айналған.
Биыл жарыс кестесіне де өзгеріс енгізілді.
Гран-при сенбі күні өтеді
Негізгі жарыс 26 қыркүйекте өтеді. Бұл бастапқыда жоспарланған мерзімнен бір күн ерте. Кестенің өзгеруіне 27 қыркүйекте Әзербайжанда әскери қызметшілерді еске алу күні аталып өтуі себеп болды. Жарыс апталығының бағдарламасы бойынша, 24 қыркүйекте еркін жаттығулар, 25 қыркүйекте іріктеу кезеңі, ал 26 қыркүйекте Әзербайжан Гран-приі өтеді.
Жарысушылар ұзындығы шамамен 6 шақырым болатын жолды 51 рет айналып өтеді. Автодромда барлығы 20 бұрылыс бар.
Биыл Бакуде «Формула-1» жарысы оныншы рет ұйымдастырылады. Осы уақыт ішінде Баку кезеңі халықаралық автоспорт күнтізбесінен тұрақты орын алып, қалалық автодром Әзербайжандағы жарыстың басты нышандарының біріне айналды.
Жанкүйерлерге арнайы бағдарлама әзірленді
Гран-при күндері Баку бульварында жанкүйерлер аймағы жұмыс істейді. Мұнда F1 жарыс симуляторы, көліктің дөңгелегін жылдам ауыстыру сайысы, Ninja Challenge, арқан жолы, түрлі спорттық және интерактивті ойын-сауық ұйымдастырылады.
Балалар үшін шағын электр көліктерімен жарыс, бетке сурет салу, шеберлік сабақтары мен басқа да ойын-сауық шаралары қарастырылған.
Сондай-ақ жанкүйерлер жүргізушілермен және командалардың өкілдерімен кездесіп, арнайы форумдарға қатыса алады. Бұдан бөлек, әртістердің өнер көрсетуі мен түрлі шоу бағдарламалар жоспарланған.
Музыкалық бағдарлама Crystal Hall сахнасында жалғасады. 24 қыркүйекте Кельвин Харрис, ал 25 қыркүйекте Кэти Перри өнер көрсетеді.