Билл Гейтс ЖИ қаупі туралы ескертті

Microsoft компаниясының негізін қалаушылардың бірі Билл Гейтс жасанды интеллектіні теріс пайдаланудың ықтимал салдары туралы ескертті. Оның пікірінше, қазіргі ЖИ құралдары адамзатқа орасан зиян келтіруі мүмкін әрекеттерді жүзеге асыруға пайдаланылуы ықтимал, деп Baspasoz.kz тілшісі Kazinform.kz-ке сілтеме жасап хабарлайды.

Гейтс басты қауіп жасанды интеллектінің өздігінен адамға қарсы шығуында емес деп есептейді. Оның сөзінше, технологияны қасақана зиян келтіру мақсатында пайдаланатын адамдар әлдеқайда үлкен қатер төндіреді.

Миллиардердің айтуынша, заманауи технологиялар күрделі кибершабуылдар жасау мүмкіндігін арттырып, биологиялық қауіпсіздік саласында да жаңа қатерлер туғызуы мүмкін. Ең ауыр сценарий жүзеге асқан жағдайда мұндай әрекеттердің салдарынан бір миллиардқа дейін адам қаза табуы ықтимал екенін айтты. Сонымен қатар Гейтс қазіргі жасанды интеллект жүйелері адам бақылауынан өздігінен шығып кететін деңгейге әлі жеткен жоқ деп санайды.

«Біз жүйелер компьютерлерді өздігінен басып алып, оларды өшіру мүмкін болмай қалатын кезеңге әлі жеткен жоқпыз», — деді ол.

Гейтс жасанды интеллектіні қауіп төнген сәтте бір ғана тетік арқылы толық өшіруге болады деген түсінікке де күмән келтірді. Оның пікірінше, технологияның қауіпсіз болуы үшін тұрақты бақылау мен сенімді қорғаныс тетіктері қажет.

Соған қарамастан, ол жасанды интеллектіні дамытуды тоқтатуға шақырмайды. Керісінше, технологияны жетілдірумен қатар оны теріс пайдаланудан туындайтын қауіптерді азайтатын шараларды қатар дамыту қажет деп есептейді.

Бұған дейін де Билл Гейтс ЖИ-ге байланысты қауіптердің артып келе жатқанын айтып, оларды азайту үшін халықаралық деңгейде бірлескен шаралар қажет екенін мәлімдеген. Оның пікірінше, ықтимал қауіпті ЖИ модельдеріне бақылауды күшейту керек.